Reportajen Silvino Freitas
Relasiona ho konfrontasaun neebe akontese iha festa kazamentu ida iha Akanunu-Hera semana kotuk, polisia detein ona suspeitu nain 12 ho naran inisial AS, DS, SX, ACS, MM, NNR, JB, MS, NM, AS, SP no AR hodi kumpri oras hitu nulu resin rua hafoin aprezenta ba ministeriu publiku hodi halo prosesu primeiru interogatoriu, nunee dadaun polisia kontinua buka tuir autor sira neebe identifikadu atu responsabiliza ba aktu sobu ema nia festa hodi estraga kadeira, meza no sasan sira seluk neebe uza iha festa refere.
Komadante PNTL Munisipiu Dili Orlando Gomes dehan, kazu neebe akontese iha Hera-Akanunu polisia halo ona kapturasaun ba suspeitu nain 12 neebe detein ona oras 72 hodi lori prosesu ba oin, nunee mos parte polisia sei halo hotu kapturasaun ba joven sira neebe identifikadu involve iha kazu asaun brutal neebe halo paniku komunidade sira, tanba nee polisia sei la tolera no sei halo hotu kapturasaun ba suspeitu sira.
“iha ida rua ita deskobre ona no ita sei kaer hotu sira, nain 12 dadaun nee prosesu ona maibe ita sei buka tuir nafatin autor sira neebe ba sobu ema nia festa, autor sira neebe halo asaun krime estraga ema nia kadeira meja no buat barak iha fatin festa nia laran ita sei bolu sira para responsabiliza ba hahalok neebe sira halo” dehan Komadante PNTL Munisipiu Dili Orlando Gomes.
Komadante nee klarifika, kronolojia ba akontesimentu nee parte polisia sei halo investigasaun ba problema refere neebe rezulta estraga sasan sira, nunee parte komandu Dili orienta ona ba komandu eskuadra postu kristo rei atu halo koordenasaun ho ofisial polisia suku no autoridade lokal atu bele haree situasaun refere, nunee husi parte vitima nain 4 maka hatoo ona keixa no suspeitu sira neebe kaptura sei kumpri oras 72 hodi detein iha sela polisia munisipiu Dili hafoin aprezenta ba ministeriu publiku hodi halo primeiru interogatoriu.
