Reportajen David da Costa
Komisaun Nasionál Juventude Katólika Timor-Leste (KNJK-TL), husu ba joventude Timor-Leste atu hamutuk hametin unidade no espíritu nasionalidade iha selebrasaun tinan 24 Restaurasaun Independénsia iha 20 Maiu. tanba momentu ne’e hanesan orgullu no ksolok boot ba povu Timor-Leste atu kontribui ba dame, solidariedade no dezenvolvimentu nasaun.
Prezidente Ezekutivu Komisaun Nasionál Juventude Katólika Timor-Leste, (PE-KNJK-TL), Padre Indra Francisco Nascimento Tey-Seran, hateten, selebrasaun tinan 24 Restaurasaun Independénsia iha 20 Maiu, momentu ne’e sai hanesan orgullu no ksolok boot ba povu Timor-Leste atu hatudu espíritu nasionalidade no kontribui ba dezenvolvimentu nasaun.
“Selebra 20 Maiu, ha’u hanoin ida ne’e ba ita orgullu tebes no ksolok boot ba ita oinsá ita mós marka prezensa hatudu duni ita nia espíritu nasionalidade atu kontribui ba buat ruma ba iha ita nasaun ida ne’e. dehan Prezidente Ezekutivu KNJK-TL, Padre Indra Francisco, iha Palásiu Prezidensial Bairo-Pite, Segunda 18/05.
Tanba ne’e, Joven ne’ebé di’ak maka joven ne’ebé iha konsiénsia di’ak atu hadomi no valoriza nia-an rasik. Ho atitude ne’e, joven bele sai ezemplu di’ak iha família no sosiedade. No joven sira mós presiza respeita ema seluk no hametin unidade iha rai ida ne’e, atu nasaun Timor-Leste bele moris iha dame no solidariedade.
“Joven ne’ebé di’ak nafatin iha konsiénsia ne’ebé di’ak atu hadomi ita ninia aan, no respeita mós ema seluk no lori nafatin unidade iha ita ninian rain ida ne’e. Tanba ne’e, nafatin ba foinsa’e sira hotu mai ita hamutuk hodi selebra festa ida ne’e,” nia konklui.
KNJK-TL Hasoru Ramos-Horta, Ko’alia Kona-ba Eventu Juventude Katólika Boot Tolu
Komisaun Nasionál Juventude Katólika Timor-Leste (KNJK-TL) ohin hasoru ho Prezidente Repúblika (PR) José Ramos-Horta, hodi partilla programa importante tolu Igreja nian, maka Assembleia Fé 2026, Jornada Nasionál Juventude iha Remexio no Jornada Mundiál Juventude 2027 iha Korea do Sul.
Prezidente Ezekutivu Komisaun Nasionál Juventude Katólika Timor-Leste, (PE-KNJK-TL), Padre Indra Francisco Nascimento Tey-Seran, hatete, husi Komisaun Nasionál Juventude Katólika Timor-Leste hamutuk ho Komisaun Juventude Katólika Diozese tolu, maka Arkediozese Dili, Diozese Maliana no Diozese Baucau.
No ohin hasoru malu ho Prezidente Repúblika José Ramos-Horta, hodi ko’alia kona-ba pontu tolu ne’ebé hakarak partilla ba Prezidente Repúblika, iha eventu sira ne’ebé sei realiza ne’ebe organiza husi Komisaun Nasionál Juventude Katólika Timor-Leste ninian.
“Ami enkontru ho Prezidente Repúblika, ami partilla programa importante tolu Igreja nian, mak hanesan Assembleia Fé 2026 ne’ebé sei realiza husi 28 to’o 31 Maiu 2026, Jornada Nasionál Juventude iha Parokia Remexio husi 16 to’o 21 Agostu 2026, no Jornada Mundiál Juventude iha Korea do Sul iha 03 to’o 08 Agostu 2027,” nia dehan.
Nune’e, iha pontu dahuluk ninian relasióna asembleia fé ninian ne’e toka liu oinsá atu halo visit mai iha Palásiu Prezidensiál, no husu mós Xefe Estadu halo audénsia ho formandu sira ne’ebé mai husi Diozese tolu, Arkediozese Dili, Diozese Maliana no Diozese Baucau.
Iha jornada nasionál juventude nian mós hanesan, partilla ba Xefe Estadu atu bele mós marka prezensa iha jornada nasionál juventude ninian iha Parokia Remexio, atu hamutuk ho foinsa’e sira bele fó nétik mensajen ruma ba foinsa’e sira iha eventu refere.
Aleinde, jornada mundiál juventude ninian mós hanesan mai partilla de’it informasaun ne’ebé sei realiza iha Korea, atu oinsá Xefe Estadu bele hatene de’it preparasaun, lori pregrinus ka joven sira depois bele ba partisipa iha eventu mundiál juventude ninian.
Entretantu, iha enkontru ne’e, Xefe Estadu hato’o primeiru agradese bele enkontru hodi partilla informasaun sira. Buat ne’ebé Xefe Estadu hato’o hela sira haree data sira ne’ebé karik livre la kona malu ho data ne’ebé propoin, entaun Prezidente Repúblika sei marka prezensa mós iha eventu sira ne’e.
