Reportajen Silvino Freitas
Reprezentante povu iha uma fukun parlamentu nasional kestiona programa merenda eskolar ne’ebe akontese iha munisipiu Manatuto ne’ebe programa ne’e la lao dezde fulan janeiru tinan ne’e no iha Lautem estudante sira husi eskola rua ne’ebe han hahan la tuir menu merenda eskolar nian, nune’e Prezidenti Autoridade Munisipiu Manatuto rekoñese problema nee akontese duni tanba eskola filial sira ne’ebe numeiru estudante kiik difisil atu implementa no halo relatorio, enkuantu iha munisípiu Lautem Prezidente Autoridade klarifika nia simu ona informasaun no kria ona ekipa investigasaun atu halo investigasaun ba eskola rua nune’e karik identifika mak sei hasai koordenador eskola rua refere.
Deputada Maria Anabela Savio dehan, hanesan reprezentante povu iha parlamentu nasional sira simu keixa balun kona-ba merenda eskolar nian nunee nia simu keixa husi EBF Kuluhun no EBC Lospalos munisípiu Lautem nian ne’ebe estudante sira han de’it fehuk tanan baluk baluk rua.
“Husi fotografia ne’e husi EBC Lautem nian, iha telefone ne’e senor PAM haree didiak ne’e Sentru Lospalos nian” dehan deputada bankada FRETILIN Maria Anabela Savio liuhosi plenaria sesaun debate orasamentu retifikativu iha parlamentu nasional, (01/06).
Nia dehan tan, prezidente autoridade munisipiu tenke kontrolu problema refere tanba keixa ne’ebe sira simu mai husi inan aman estudante sira nian, nune’e mos merenda eskolar nee laos parte Lautem de’it maibe kuaze teritoriu nasional eskola hotu enfrenta.
Fatin hanesan deputadu Antoninho Bianco mos kestiona problema hanesan ne’ebe akontese iha munisípiu Manatuto postu laclubar nian ne’ebe hahu iha tinan 2026 kedas programa ne’e la lao, tanba nia husu ba prezidente autoridade munisipiu sira atu bele kontrola tanba programa refere la lao dezde fulan janeiru tinan ne’e.
“Laclubar oan ne’e besik hela prezidente autoridade iha ne’e karik bele esplika hirak ne’e no seluk mos bele esplika hotu, hau ko’alia tanba hau hetan informasaun no kontaktu diretamente” dehan deputadu Antoninho Bianco iha sesaun debate orasamentu retifikativu.
Antoninho Bianco salienta tan, prezidente autoridade hotu bele ralata progresu implementasaun programa merenda eskolar atu komunidade sira bele entende dezafiu husi implementasaun programa refere, tanba programa refere la lao nia problema nee dalan mak la diak osan mak seida’uk halo tranferensia.
Hatan ba kestaun prezidente autoridade munisipiu Manatuto Luis Inacio Fernandes rekoñese, programa merenda eskolar ne’e lao tarde duni maibé laos iha eskola sentral tanba eskola sentral sira numeiru estudante ne’e barak maibé problema nee akontese iha eskola filial sira ne’ebe estudante sira numeiru kiik nune’e difisil atu buka ema implementador programa susar liu mak atu halo tan relatoriu.
“Ita halo sumariu de’it se ho de’it alunus 80 multliplika ba 42 centimo iha pur volta $32 de’it iha fatin sira izoladu ita susar atu buka hahan sira no buka implementador sira atu asina kontratu mos susar sa tan ita husu sira atu halo tan relatoriu” dehan PAM Manatuto Luis Inacio hodi hatan preokupasaun deputadu sira iha ambitu debate orasamentu retifikativu iha parlamentu nasional.
Luis Inacio esplika liu tan, iha munisípiu iha ekipa avaliasaun ne’ebe hamutuk ho diretor finansa no fiskalizasaun ne’ebe halo akompanamentu no dadaun ne’e munisipiu Manatuto propen atu halo treinamentu ba ekipa implementador sira, nune’e liga ho problema programa merenda eskolar ne’e iha eskola filial neebe menus estudante sira kuaze hasoru problema ne’ebe hanesan no estudante sira ne’ebe estudante barak programa lao diak tebes.
PAM Lautem Melio de Jesus mos hatan ho rekonesementu katak, vidio ho fotografia ne’ebe aprezenta husi deputada Maria Anabela Savio ne’e loos duni ne’ebe informasaun neebé nia rekolla no nia forma kedas ekipa investigasaun tanba ekipa neebe implementador mak ekipa ho naran jestaun programa neebe implementa programa merenda eskolar ne’e iha nivel eskola sira.
“Eskola filial Kuluhun no Lautem ekipa jestaun programa ekipa jestaun programa fornese aihan no menu ne’ebe atu fornese aihan ba ita nia alunu sira, maibe tuir informasaun neebé hau rekolla seidauk ba investigasaun sasan sira ne’e ba semana rua sira la tein hodi prejudika hanesan fotografia ne’ebe ohin distinta deputada aprezenta tanba ne’e mak autoridade munisipiu halo asaun kedas forma ekipa investigasaun” dehan PAM Lautem Melio ba deputada Maria Anabela Savio.
Melio konklui, ekipa investigasaun ne’ebe nia forma ona lidera husi sekretariu munisipál asuntu sosial no organizasaun komunitaria diretor fiskalizasaun diretor saúde diretor finansa diretor edukasaun no diretor seguransa alimentar atu halo investigasaun profundu karik informasaun neebé los mak sei hasai koordenador eskola neebe implementa jestaun programa, nune’e prosesu investigasaun sei lao tanba ne’e kuandu iha ona rezultadu maka iha segunda feira semana oin sei foti dezisaun ba ekola rua ne’ebe deputada kestiona.
