Reportajen Silvino Freitas
Komandu Operasaun Munisípiu Dili sei halo seguransa ba simu kadaver eis Prezidente da Republika Francisco Guterres ‘Lu Olo’ ne’ebé sei too iha Timor Leste iha aban husi Malaysia mai Dili, nune’e durante lutu nasionál loron 7 parte sei asegura situasaun sira atu labele barullu iha fatin fatin, nune’e mos hapara situasaun barullu husi adeptus asiste kopa mundiál.
Komandante Operasaun PNTL munisipiu Dili, superintendente assistente polisia Luis Amaral dehan, komandu munisípiu Dili hetan orientasaun husi komandu jerál hodi prepara planu operasaun ba simu kadaver eis prezidente Repúblika Francisco Guterres ‘Lu-Olo’ husi aeroportu internasional Nicolao Lobato mai iha nia rezidensia no sei planu atu koloka membru sira iha dalan no parte tranzitu mós sei halo eskoltu ho batadores hodi lori saudozu nia mate isin ba iha nia rezidensia.
“ami sei halo operasaun iha fatin fatin liu-liu ba jogu Kopa Mundiál, ami sei halo nafatin patrolamentu nune’e hapara sira-nia atividade barullu, bele asiste bele nonton maibé labele barullu tanba ne’e ita-nia heroi nasionál nune’e ita hotu hato’o ita-nia sentidu condolências ba ita-nia aman Lu-Olo, polísia iha dever atu fó hatene ba sira ne’ebé lori mikroleet sira-ne’e atu loke múzika ho volume ne’ebé kiik” dehan Komadante Operasaun Munisípiu Dili Luis Amaral iha rezidensia eis Prezidente da Republika Francisco Guterres Faról, (22/06).
Nune’e Ministru Interior Francisco Guterres dehan, nia sei fo orientasaun ba parte seguransa atu labele iha barullu no organiza didi’ak atu ema labele halo tun sa’e, halo festa tun sa’e, husu atu labele haklalak demais tanba ita iha hela lutu loron hitu ninia, ita lutu ba ita-nia heroi nune’e husu ba parte joventude sira ba haree nontong futeból nonok ho hakmatek no labele halo barulu tanba iha hela lutu ba loron hitu.
“Husu dala ida tan ba joventude no komunidade katak ita hotu tenke respeita ba lutu ba loron 7 ninia, múzika labele lian barulu no labele halo atividade ne’ebé mak atu desrespeita ba desizaun governu nia ne’ebé foti ona katak ita lutu nasionál” dehan Ministru Interior Francisco Guterres hafoin remata reuniaun konsellu ministru ekstraordinaria iha salaun auditoria Ministra Finansa aitarak laran, (22/06).
Nune’e mos televizaun LD sira ne’ebé monta iha fatin publiku sira parte seguransa sei kordena ho RTTL atu haree hodi prevene lai durante iha loron 7 lutu nasionál ba falesimentu eis Prezidente da Republika saudozu Francisco Guterres ‘Lu-Olo’ to’o haloot isin mate saudozu eis Prezidente, nune’e kona-ba preparasaun simu maktoban parte seguransa preparadu atu halo seguransa.
