Home Feature Jovem Feto Produs Bee Galong Lafaek, COVID-19 Fo Impaktu Ba Lukru Maibe...

Jovem Feto Produs Bee Galong Lafaek, COVID-19 Fo Impaktu Ba Lukru Maibe Kontinua Luta

471
0
Jovem feto sira ne'ebe produs bee galong lafaek. [Foto: Copyright Bee Lafaek | 25.09.2020]

Reportazen Klinika Jurnalismu UNTL-UNESCO

Pandemia COVID-19 ne’ebe hahu akontese rai Wuhan iha Xina, ne’ebe fo impaktu boot ba ema barak nia saude no balun to’o mate tanba imunidade ema balun ne’ebe fraku hodi proteje an hosi virus ne’e.

Hosi Wuhan kontinua daet ba nasaun sira seluk to’o ikus Timor-Leste mos afeta no konsege iha ema nain 24 mak konfirmadu positivu COVID-19.

Hosi virus nia hahalok ne’e, halo nasaun boot sira taka odamatan, hapara atividade publiku no taka kompania barak, ho razaun atu la hadaet virus hosi ema ida ba ema seluk, ekonomia lao normal, kompania barak ezonera nia funsionariu tanba la hetan rendimentu.

Virus ne’ebe la fo impaktu deit ba ema nia saude, maibe impaktu mos ba seitor ekonomia, membru Klinika Jurnalismu ne’ebe realiza hosi UNTL-UNESCO dadalia ho kompania lokal ida, ne’ebe mak harii sira nia negosiu produs Bee Galong.

Kompania Bee Lafaek, ne’ebe produs bee galong, ne’ebe domina hosi joven feto sira, oinsa sai empreendedor hodi kria serbisu ba an rasik, nia mak Frederica Rossa nudar nain ba Bee Lafaek, joven feto ida ho nia abilidade konsege hamutuk ho nia feto maluk sira, harii kompania refere.

Frederica Rosa konfesa katak moras Pandemia COVID-19 ne’ebe akontese, afeta tebes ba sira nia negosiu, tanba hamosu rezultadu negative ba atividade ne’ebe sira halo, bee ne’ebe sira produs nia numeru tun bebeik durante propagasaun COVID-19, liu-liu iha estadu emerjensia

“Ha’u nu’udar nain ba produsaun ida ne’e, tuir ha’u nia obserbasaun katak Moras Mundiál Surtu Corona Virus (Covid-19) nia prezensa ne’e hamate tebes ami nia bisnis, halo ami ta’uk no paniku  nomós  movimentu menus, halo ema la brani atu sai, entaun kliente sira movimentasaun atu mai foti rasik ami nia bee ne’e tun beik-beik, durante iha estadu emerjénsia nia laran”, dehan Frederica ba Klinika Jornalizmu iha Kampus FCS Kaikoli Dili, Tersa (22/09/202).

Bee Lafaek ne’ebe harii antes COVID-19, hatudu rezultadu rendimentu ne’ebe fo sorte ba sira, Frederica ho nia ekipa iha abilidade oinsa manaje sira nia orsamentu, maibe tanba pandemia COVID-19, rendimentu ne’ebe tun susar ba sira atu maneja osan no rai osan ba sira nia grupu.

“Antes COVID-19 seidauk iha ami rendimentu ne’e a’as maibé depois COVID-19 iha, susar ba ami atu hetan rendimentu ne’ebé di’ak,  entaun ami tenke foti fali osan ne’ebé durante ami rai, hodi taka ba durante pandémia COVID-19 nia laran, depois liu tiha fulan tolu ba leten ne’e sa’e uituan, maske iha Timor seidauk hotu maibé atividade la’o hanesan bain-bain no livre ba ema hotu no nafatin kumpri regra Organizasaun Saúde Mundiál (OMS), nian maibé ha’u bele hateten katak rendimentu hanesan fali la’o normal”, nia esplika.

Ba klinika jurnalismu Frederica mos iha ona stratejia sekarik iha kazu foun iha Timor, nia sei halo tuir protokolu saude nian no la aumente numeru konsumedor no kontinua ho kliente ne’ebe maki ha ona, hodi nune’e ita hotu bele proteje an hosi moras ne’e, maskte tenke hasoru konsekuensia ekonomika nian.

Jovem feto ne’e hateten hakarak kria serbisu ba an rasik no lakohi tane liman ba ema seluk no rezultadu hatudu ohin hetan susesu.

“Ha’u hakarak tebes buka rasik osan no labele tane liman ba ema seluk, signifika katak ha’u nia esforsu rasik halo servisu maka’as, halo produsaun mesak ohin loron hetan susesu, tanba ha’u nia mehi no bisnis ida ne’e la’o hamutuk.  Ha’u gosta lo’os kompete ba oportunidade ida ne’e, tanba galon nia modelu ne’e úniku no kualidade, diferente ho sira seluk tan ne’e mak ha’u kompete duni ba produtu ne’e,” nateten Frederica hodi kontinua motiva an.

Frederica Rossa nu’udar joven feto ida ne’ebé mak ho inisiativa harii produsaun bee gallon. Frederica enkoraza joven feto sira seluk hodi iha espiritu kapasita an, hasae abilidade hodi prepara futuru ne’ebe naroman. Nia iha mehi hosi negosiu ne’ebe mak nia halo, hakarak hola transporte rasik, hodi nune’e bele halo fasil serbisu distribuisaun bee lafaek ba kliente sira iha Dili laran no pronto atu distribui bee lafaek iha municipiu 12.

*(Joselina dos Santos nudar estudante UNTL ne’ebe partisipa iha formasaun Kliniku Jurnalismu ne’ebe realiza hosi UNTL ho UNESCO, no mentor publika nia artigu iha Neon Metin)

LEAVE A REPLY

Please enter your comment!
Please enter your name here