Reportazen Santina Lucia da Costa
“Tuir lolos sira la tama kriteria husi Ministeriu Edukasaun ho Ministeriu Saude atu re-ativa eskola refere, tanba bee moos laiha, fasilidade atu prevene-an mos laiha, maibe profesores sira iha inisiativa. Ami ba hola tiha bee moos tanki ida mai tau iha eskola nakonu ne’e mak ami re-ativa fali eskola sira hola bee tau iha sira nia eskola, hodi nune’e prosesu aprendizajen bele lao fila-fali”, Fernando dos Santos
Relasiona ho moras surtu Covid-19, governu liu hosi Ministeriu Saude no Ministeriu Edukasaun serbisu hamutuk ho Organizasau Mundial Saude, hodi kontinua halo prevensaun hosi propasaun Covid-19 iha eskola sira bainhira reativa
Neon Metin halo observasaun direita iha eskola baziku 1 no 2 Maubara hatudu katak governu sedauk fo fasilidade ba eskola baziku iha fatin refere, hodi preven-an hosi Covid-19 no estudante sira hola maskra rasik, hodi uza durante tuir prosesu aprendizajen iha eskola.
Neon Metin dadalia ho Koordenador Eskola Ensino Baziku 1, 2 Maubra, Fernando dos Santos konaba situasuan ne’ebe eskola hasoru. Ba Neon Metin Fernando hateten durante reativa fali eskola, estudante iha eskola refere sedauk simu fasilidade prevensaun nian hosi governu nasional.
“Durante ami re-ativa fila-fali eskola ami seidauk simu maskra no fasilidade sira husi governu atu prevene-an husi Covid-19 ne’e, no ate agora seidauk simu. Ami obriga labarik sira hola rasik maskra hodi prevene-an, antes tama ba sala laran. Ami so simu sabaun oituan husi Care Internasional”, Hateten Koordenador Eskola Ensino Baziku 1, 2, Maubara, Fernando dos Santos ba Neon Metin, Maubara, loron, Kuarta, 22/7
Fernando hateten Ministeriu Edukasaun, Juventude no Desportu (MEJD) fo ona formasaun konaba Covid-19 ba manorin sira no hetan ona sertifikadu. Manorin hamutuk 16 mak tuir formasaun refere.
“Tuir lolos sira la tama kriteria husi Ministeriu Edukasaun ho Ministeriu Saude atu re-ativa eskola refere, tanba bee moos laiha, fasilidade atu prevene-an mos laiha, maibe profesores sira iha inisiativa. Ami ba hola tiha bee moos tanki ida mai tau iha eskola nakonu ne’e mak ami re-ativa fali eskola sira hola bee tau iha sira nia eskola, hodi nune’e prosesu aprendizajen bele lao fila-fali”, hateten Fernando
Fernando dehan manorin sira halo inisiativa rasik, hodi organiza estudante sira, oinsa mai ne’e tenki prepara bee, sira mai fase tiha liman, mak foin bele tama sala laran hodi tuir prosesu aprendisajen.
Fernando informa eskola refere fahe turma rua ba sesaun dader no meudia, hodi bele aplika distansia fiziku.
“Antes Covid-19 seidauk iha ne’e, estudante iha sala ida 40 to’o 40 resin, agora dadaun ami fahe estudante ba dader no lokraik sala ida 20 pesoas, atu nune’e sira tur iha sala laran distansia ne’e metru 1,” informa, Fernando.
Estudante Eskola Ensinu Baziku 1, 2, Maubara hamutuk 547, mane 297 no feto 250. Sala aprendizajen hamutuk 6.
