Reportazen Zevonia Vieira
Timoroan sira ne’ebe turi formasaun iha konaba Agrikultura Avansadu iha Israel ezije ba governu , hodi buka solusaun para sira bele fila mai Timor-Leste.
Neon Metin dadalia direta ho timoroan nain tolu liu hosi video call WhatApp, Joel Noronha da Silva ezije ba Ministeriu Agrikultura no Pescas (MAP) no Ministeriu Negosiu Estranjeiru no Kooperasaun (MNEK) hodi esforsu an, para sir abele fila mai Timor iha tempu badak nia laran.
Joel hateten situasaun pandemic COVID-19 iha Israel kada loron sempre sae no ida halo maluk timoroan sira preokupa no tauk. Nune’e dalan diak liu mak bele fila lalais mai Timor.
“Ami husu ba governu tanbasa ami sedauk bele fila ba Timor, ami husu ba MAP no MNEG buka meus lori ami fila, tanba ami nia formasaun remata ona iha Junhu no ami nia visa mos foin lalais mate iha fulan Julhu maibe estende tan to’o loron 1 Outubru”, hateten Joel via video call, 18/09.
Joel dehan iha temou besik nia laran Israel sei mailirin liutan, populasaun sira iha ne’e preokupa tebes karik sei bele afeta boot liutan hodi kona Corona no lakohi atu hela kleur tan iha Israel.
Hanoin hanesan mai hosi Akun Machado mos hatoo nia ezijensia ba governu Timor-Leste atu bele lalais halo prosesu atu sir abele fila mai Timor.
“Ami la husu osan, ami hakarak deit governu lalais buka dalan, buka aviaun para ami bele fila ona. Konaba osan ami la preokupa tanba ami sei bele sustenta ami nia moris, agora ami hakarak mak fila ba Timor. Se ami fila ba Timor iha fulan Junhu karik, pasti ami nia maluk Joel sei la afeta kazu positivu COVID-19”, hateten Akun
Akun mos dehan iha fulan Julhu no Agusto konsege halo kontaktu ho MAP maibe to’o ohin loron sedauk iha informasaun klaru hosi sira no ami kontiua ezije kata kami hakarak fila ba Timor.
Iha dadalia ne’e Neon Metin mos dadalia ho Joel Noronha da Silva ne’ebe mak konfirmadu kazu Pozitivu COVID-19 no agora dadauk izola an iha rai Hazheva ne’ebe tama ona loron tolu nia laran.
Maluk timoroan ne’ebe dadalia ho Neon Metin mak Joel Noronha da Silva nudar pasiente COVID19 mai hosi municipiu Bobonaro, Akun Machado hosi Bobonaro no Ruben Hamas hosi Ainaro.
