Home Saude Neon Metin Dadalia Ho Timoroan Afeta COVID-19 Iha Israel, Joel: Tenke Koidadu

Neon Metin Dadalia Ho Timoroan Afeta COVID-19 Iha Israel, Joel: Tenke Koidadu

2599
0
Joel Noronha mak iha liman los, Ruben Hamas no Akun Machado mak iha liman karuk uza maskra. [Foto: Zevonia Vieira | 18.09.2020]

Reportazen Zevonia Vieira

“COVID-19 la halimar, bainhira ita sedauk kona ita sente diak hela, maibe bainhira ita kona ona mak ita foin sente tauk ne’e iha”. Joel Noronha

Maluk timoroan ne’ebe oras ne’e dadauk halao hela formasaun  agrikulta avansadu iha Israel afeta hela kazu positivu COVID-19.

Neon Metin dadalia ho pasiente timoroan liu hosi Video Call WhatApps hodi hatene situasaun ne’ebe nia hasoru.

Pasiente COVID-19 mak naran Joel Noronha da Silva hosi municipiu Bobonaro, liu hosi entrevista ho video call hateten, bainhira iha loron 4 Septembru, timoroan sira ba Jerusalem hodi komemora masakre 4 Septembru, momentu fila komesa hatudu sintomas COVID-19.

“Hau rasik mak kona COVID-19, prosesu kona ne’e momentu ami ba Jerusalem hodi komemora 4 Septembru. Ami fila mai iha loron 5 Septembru ami deskansa deit no iha loron 7 Septembru hau la ba tuir formasaun tanba isin komesa manas no muta, hau nia supervisor lori hau ba klinika, konsulta no fo aimoruk hau hemu”, konfesa Joel via video call, 18/09.

Joel hatutan depois lori nia ba ospital referal Be’er Sheva hodi halo swab test no rapid test, ikus detekta positivu COVID-19 no Joel hateten kuaze ospital sira iha Israel nakonu tanba moras Corona, ho nune’e dotor sira desidi hodi izola an, iha nia hela fatin iha Hazheva.

“Agora hau izola an loron 3 ona iha hau nia fatin no dook hosi kolega sira hotu. Hau nia kolega sira seluk mos kuarentena sira nia an iha sira nia hela fatin no labele hasoru malu”, hateten Joel

Joel informa katak nia hetan tratamentu diak hosi dotor sira, tanba sempre hetan kontaktu sira hosi dotor sira, hodi bele akompanha nia kondisaun, “sira fo aimoruk isin manas no muta nian, sira fo aifuan ho hahan nutrisaun sira para bele hasae hau nia imunidade, para bele diak lalais hosi COVID-19”.

Ba Neon Metin Joel fo lia menon ba populasaun timor sira katak, ema idak-idak presiza iha konsiensia katak koidadu an hosi virus Corona tanba virus ne’e iha duni.

“ Maluk sira tenke koidadu no hadok-an hosi virus Corona, liu-liu ema sira ne’ebe tama sai illegal liu hosi fronteira. COVID-19 la halimar, bainhira ita sedauk kona ita sente diak hela, maibe bainhira ita kona ona mak ita foin sente tauk ne’e iha. Husu maluk sira atu tuir protokolu saude nian, atu bele koidadu an nafatin hosi virus Corona”, Joel hateten nakonu ho esperansa.

Tuir informasaun ne’ebe Joel hatoo katak maluk timoroan sira ne’ebe ba hamutuk, balun mos komesa hatudu sintomas no deskonfia sintomas COVID-19. Total estudante ne’ebe tuir formasaun iha Israel hamutuk nain 72.

Ba Neon Metin Joel hateten maske nia positivu corona, maibe nia saude komesa diak, la dada iis araska ka boot no kontinua deskansa barak to’o loron 14 nia laran.

oras ne’e dadauk kazu konfirmadu positivu COVID-19 iha Israel to’o ohin loron total 161,213, ema ne’ebe mate total 1,139.

LEAVE A REPLY

Please enter your comment!
Please enter your name here