Reportazen Francisco JDA
Relasiona ho Serka Sanitaria (SS) ne’ebé la’o besik fulan ida ona no fo implikasaun ba atividade roda ekonomia, no afeta ba estudante sira ne’ebe sira nian familia hela iha municipio seluk, ne’ebe la bele transfere ai-han ou osan mai Dili.
Liu hosi plenaria iha uma fukun Parlamentu Nasional, ne’ebe halo reuniaun ho membru governu sira, nune’e deputadu Adriano Nasimentu hatoo nia intervensaun katak estudante ho populasaun ne’ebé hela iha Dili, labele fila tanba estadu emergencia.
“Ha’u nia preokupasaun ne’e ba iha estadu bele tetu tok ba, estudante sira ne’ebé hela iha kost iha Dili no povu ne’ebé hela iha Dili tanba labele fila, buka dalan ida, se Serka Sanitaria ne’e seidauk iha serteza atu loke, ha’u propoin ita haruka estudante sira ou ema sira ne’ebé mai hosi foho ne’e fila ba ida-idak nia rain, atu nune’e sira han saida mak sira kuda, tan iha foho ne’e fasil mais iha Dili laran hein loja no kios,” hateten Deputadu Adriano Nasimentu, iha Parlamentu Nasionál, 29/03.
Hatan ba kestaun ne’e, Sekretario Estadu Komunikasaun Sosial (SEKOMS), Mericio Akara dos Reis hatan katak, idea ne’ebé deputadu sira fo, atu estudante sira fila ba foho ka ida-idak nia Municipiu idea sira ne’e governu sei halo analiza didiak, ho Centro Integradu depois mak refletas medidas estadu emergensia tuir mai.
“Ohin Konselho Ministro enkontru hela kona ba extensaun estadu emergencia, ha’u seidauk bele adianta buat ruma hein de’it dezisaun konselho Ministro, depois mak medidas implementasaun governu sei deskute iha prosesu tuir mai,” hateten Mericio Akara iha PN
