Home Feature Modo La Folin Iha Tempu Serka Sanitaria, Angelina: Hau Triste

Modo La Folin Iha Tempu Serka Sanitaria, Angelina: Hau Triste

343
0
Angelina de Carvalho da Cruz. [Foto: Santina Lucia da Costa | 29.03.2021]

Reportazen Santina Lucia da Costa

Relasiona ho Serka Sanitaria fó impaktu tebes ba negosiante kiik sira iha area rural, liuliu feto faluk sira iha area rural, ne’ebé mak fa’an iha dalan ninin tanba modo la folin, sai dodok no fó han hotu ba animal.

Hanesan babain, loron ba loron hosi dader to’o rai nakaras, atividade faan modo iha dalan ninin sira, iha area rural mak serbisu lor-loron nian ba inan faluk iha Ossu, hodi sustenta nia uma laran.

Angelina inan faluk ida hela iha Ossu, kulit komesa namkurut tanba fator idade, maibe ida ne’e la limite nia tempu, hodi kontinua nia moris, liu hosi faan modo iha dalan ninin. Angelina de Carvalho da Cruz, hela iha Aldeia Bakai-Isi, suku Ossu Decima, Postu-Administrativu Ossu, Munisipiu Viqueque.

Hafoin Neon Metin hakat besik hodi dadalia ho Angelina, bainhira nia fa’an modo iha dalan ninin iha Ossu/Waida, konaba situasaun ne’ebe nia hasoru iha situasaun serka sanitaria. Ba Neon Metin Angelina konfesa katak nia faan sasan iha tinan 2005, fa’an modo hodi haree oan hakiak sira nia eskola, eduka sira to’o  remata eskola sekunadria,  hafoin remata, sira labele kontinua iha universidade tanba osan laiha.

“Hau nia katuas oan mate tinan 14 ona, oan laiha, hakiak labarik na’in 3. Hahu fa’an sasan iha 2005, hau fa’an modo hodi haree hau nia oan hakiak sira nia eskola, hau eduka sira to’o SMA remata, sira labele ba kontinua iha universidade tanba osan laiha. Hau feto faluk, laiha natar, to’os ida ba hau, tanba ne’e mak osan laiha, sira labele kontinua iha universidade,’’ haktuir Angelina de Carvalho da Cruz, iha Postu-Administrativu ossu, Munisipiu Viqueque, loron 26/03.

Iha situasaun serka sanitaria ne’e Angelina nia modo laiha folin no modo barak mak dodok, fo han hotu ba fahi.

“Iha Estadu Emerjensia ne’e, ami ba hola tiha modo, mai fa’an tutan fali, ema la hola, dalaruma loron ida sorti di’ak ema mai hola $1.00- $2.00 de’it, modo barak mak dodok, hau triste maibé antes governu seidauk aplika serka sanitaria ema mai hola modo, loron ida ami hetan $15.00 to’o $20.00,’’ Konfesa, Angelina nakonu ho matan wen.

Nia hatutan modo sira la folin ne’e, oinsa mak bele hatutan moris, hosi dader to’o rai nakaras bele hetan deit $0.25 cen, ida ne’e hola deit mie instant hodi kasu hela kabun

Nia dehan virus corona ne’e mosu iha Timor, hamosu sentimentu tauk, hakmatek de’it iha uma, ema fó sai iha radiu, televizaun dehan katak moras ne’e tama ona ita nia rai, dehan labele tur besik malu, fase liman beibeik ho sabaun no uza maskara.

Angelina husu ba governu hodi tau matan ba feto faluk sira, labele halo diskriminasaun, labele koalia iha tempu kampanha deit, hodi sosa povu nia votus, “tan povu iha, mak governu iha”.

Print Friendly, PDF & Email

LEAVE A REPLY

Please enter your comment!
Please enter your name here