Reportazen David da Costa Gusmao*
Diretor Nasional Bombeiros, Claudio da Silva informa katak ekipa bombeiros nasional menus transporte hodi fornese bee moos ba komunidade afetadu inundasaun iha Dili, tanba maioria komunidade ho volume ne’ebe bo’ot, tanba ne’e susar atu fornse bee ba komunidade sira iha Dili kada loron.
“Hau hakarak informa ba publiku katak hafoin inundasaun akontese iha loron 4 Abril, kuaze infrastrutura bee iha kapital Dili aat kuaze 50% to’o 70% portantu komunidade iha Dili sofre ba bee moos, tanba ne’e mak ami husi bombeiros nafatin fornese ba sira em jeral Dili laran no serbisu hamutuk ho bee Timor-Leste, hodi fasilita bee ba komunidade sira iha Dili”, dehan Diretor DNBTL, Claudio ba jornalista sira, iha serbisu fatin Kaikoli, 14/04.
Nia haktuir tan maske bombeiros iha Dili iha kareta rua deit, maibe sei serbisu ho ekipa sira husi munisipiu, hodi bele reforsa serbisu fornesementu bee moos ba komunidade sira.
“Ami iha viaturas iha fornesementu nasional iha Díli, ne’e iha kareta rua ida ho bee 10 mill litrus no ida seluk 5mill litrus, maibe ami husu reforsa tan husi munisipíu tolu ho kareta tanki tolu tan, ho nune’e hamutuk 15 mill litrus,” nia deklara.
Ho apoiu serbisu ekipa bombeiros husi munisipiu tolu, ekipa bombeiros nasional iha Dili kada loron fornese bee ba komunidade afetadu inundasaun por volta 50 to’o 60 mill litrus.
Nia esplika tan komunidade ne’ebe lokaliza iha area lagoa Tasi Tolu dadaun ne’e ekipa operasaun halo ona intervensaun serbisu hamutuk ho Forsa Defesa Timor-Leste, hodi bele apoiu serbisu nune’e apoiu komunidade ne’ebe afetadu husi inundasaun.
“Iha parte danau Tasi Tolu iha ekipa operasaun intervensaun mak responsabel iha area ne’ebe husi loron inundasaun to’o ohin loron nafatin destaka iha fatin refere, hodi apoiu ba komunidade sira iha lagoa Tasi Tolu, tanba uma hetan estragas depois sira labele sai entaun ami serbisu hamutuk F-FDTL parte kompetente sira, hodi responde ba situasaun ne’e,” nia subliña.
Direktor ne’e haforsa tan ho situasaun hanesan ekipa bombeiros Timor-Leste menus tebes kareta tanki bee mos, hodi bele forneses bee ba komunidade sira.
“Kuandu iha situasaun grave hanesan ita nia kareta sira la to’o nafatin ho rajaun katak ita nia komunidade iha Díli laran ne’e sofre, entaun ami la konsege halo atendementu hotu ba sira iha loron ida, ita presija tempo tanba tanki bee moos ba ami la sufiente, atu halo fornesementu maske ho kestaun ne’e ami iha dalan seluk atu bele apoiu bee moos ba komunidade sira,” nia hakotu.
*(David da Costa Gusmao nudar estudante UNTL ne’ebe halo estajiu iha Neon Metin)
