Reportazen Zevonia Vieira
Ho numeru kazu konfirmadu pozitivu COVID-19 ne’ebe kada loron sae ba bebeik, liu-liu iha municipio Dili, liu hosi zoom press conference, Koordenador Forsa-Tarefa ba Prevensaun no Mitigasaun Surtu Covid-19 iha Timor-Leste, Dr.Rui Maria de Araújo apel ba jovem sira, atu nafatin koidadu-an, hodi la hetan daet virus SARS-COV-2, husi ema ruma, wainhira la’o sai husi uma, hafoin da’et tutan ba ferik ho katuas sira iha uma-laran.
Dr. Rui dehan sira ne’ebé idade tinan 60 ba leten, no sira ne’ebé sofre ho moras seluk tan, vulnerável liu atu tama iha kategoria moderadu no grave, wainhira hetan da’et husi virus ne’e.
Nune’e Dr. Rui mos apela atu sidadaun respeita nafatin regra prevensaun no ijiéne individual, ne’ebé governu hatu’ur ona atu prevene moras COVID-19 da’et ba mai.
Dadus jeral konfirmadu kumulativu hosi 21 Marsu 2020 to’o ohin loron 1657, kazu foun 148 (iha Dili 118 no iha municipio seluk 30). Husi total kazu detetadu foun ohin mane 79, feto 69. Husi total kazu detetadu foun ohin asintomátiku 141 (95,2%), sintomátiku 7. Husi total kazu detetadu foun ohin, 62 (41,8%) maka deteta tamba halo teste ho razaun atu halo viajen/ka halo ona viajen ba Munispiu hafoin deteta pozitivu. Maski nune’e, sira ne’ebé rezultadu teste pozitivu, maioria sira nia hela fatin, iha duni cluster sira ne’ebé iha kazu detetadu barak.
