Reportajen Zevonia Vieira
Ministeriu Saude (MS) deteta tan kazu konfirmadu COVID-19 iha loron 23 Maiu hamutuk 156. Liu hosi komunikadu imprensa Koordenador Forsa-Tarefa ba Prevensaun no Mitigasaun Surtu Covid-19 iha Timor-Leste, Dr.Rui Maria de Araújo relata ba jornalista sira katak kazu detetadu foun ohin hamutuk 156 (iha dili nain 130 no iha municipio sleuk 26).
Husi total kazu detetadu foun ohin mane 86, feto 70. Husi total kazu detetadu foun ohin, hirak ho idade tinan ho idade 60 nain 3. Husi total kazu detetadu foun ohin, proporsaun kazu sintomátiku hamutuk 10,8%.
Kazu rekuperadu hamutuk 122, total kazu ativu hamutuk 2542. Total kazu konfirmadu kumulativu sura hosi loron 21 Marsu 2020 to’o ohin loron total 5637 no total óbitu ne’ebé relata ohin hamutuk nain 2, ho detalha hanesan tuir mai katak feto, idade 73 anus timoroan, ba HNGV iha loron 13 Maiu tamba isin-manas, mear maran, i’is-bo’t, diagnostikadu ho pneumonia, no deteta mós SARSCoV2 ho Cycle Threshold (CT) N gene 23,6, c gene 23,8.
Dr. Rui hatutan katak matebian iha istória diabetes ho komplikasaun neuropatia diabétika. Hahu kedas loron 13 Maiu kalan, halo tratamentu iha fatin izolamentu Vera Cruz ho oksijéniu iha kánula, hafoin iha loron 15 Maiu kontinua ho tratamentu oksijéniu liu husi CPAP (Continuous Positive Airway Pressure) iha ICU, maibé tamba saturasaun oksijéniu nafatin la sufisiente, médiku intensivista deside halo ventilasaun asistidada liu husi ventiladór, enkuantu kontinua ho tratamentu ba diabete, no mós tratamentu seluk ba sindroma insufisiénsia respiratória aguda (SIRA).
“Horikalan 19h55 matebian i’is-kotu, tanba multiple organ failure (orgaun lubuk-ida iha isin la funsiona). Familia koordena ona ho ekipa CIGC-SS atu halo hala’o funeral tuir protokolu ne’ebé iha”, dehan Dr.Rui.
Obitu seluk mak feto idade 52 anus, timoroan, ba HNGV iha loron 21 Maiu ho i’is-bo’ot. Matebian moras iha uma semana 2 ona, iha istória diabetes, tensaun a’as, 2 no problema tiróide. Iha HNGV diagnóstikadu nu’udar sindroma insufisiénsia respiratória aguda (SIRA), rezultadu teste PCR pizitivu ho CT N2 gene 38,4 & E gene 37,3.
Matebian transferida ba fatin izolamentu Vera Cruz iha kedas loron ne’e, hahú tratamentu oksijéniu liu husi CPAP (Continuous Positive Airway Pressure) iha ICU, maibé tamba saturasaun oksijéniu nafatin la sufisiente, médiku intensivista deside halo ventilasaun asistidada liu husi ventiladór, enkuantu kontinua tratamentu ba ninia kondisaun saúde sira seluk.
“Ohin dader 09h15 matebian i’is-kotu, tanba multiple organ failure (orgaun lubuk-ida iha isin la funsiona). Familia kordena ona ho ekipa CIGC-SS atu halo hala’o funeral tuir protokolu ne’ebé iha”, dehan Dr. Rui.
Hosi horseik to’o ohin loron 23 Maiu, ema hamutuk 685 mak halo teste PCR iha Dili, dadus kumulativu konfirmadu iha Dili susra hosi tinan 2020 to’o ohin loron total 4808 no kazu ativu Dili akumula 2060 no obitu ka ema mate ho COVID hamutuk 13.
