Reportajen David da Costa Gusmao
Sekretaria Estadu Protesaun Sivil (SEPS) liu hosi ninia Diresaun Nasional Konflitu Komunitaria (DNPKK) serbisu hamutuk ho Plan Internasionál Timor-Leste (PITL) halo sensibilizasaun konaba “Jestaun Emosaun, Prevensaun ba Konflitu no Protesaun ba Labarik” ba membru ajente Polisia Nasionál Timor-Leste (PNTL).
Sekretaria Estadu Protesaun Sivíl (SEPS), Joaquim Gusmão hatete SEPS ho nia DNPKK serbisu hamutuk PITL no PNTL halo sensibilizasaun ba ajente polisia sira ho Objetivu konaba Jestaun Emosaun, Prevensaun ba Konflitu no protesaun ba komunidade, labarik no feto sira.
“Ita iha tinan ida resin ho situasaun COVID-19 no ita mos hasoru ita kalamidade Deszastre naturais ne’ebe mak iha presaun makaas liu liu konaba atuasaun membru polisia nia iha tereinu, ho ida ne mak ita foti objetivu ida ne’e hodi fo formasaun ba ita nia ajente sira ne’ebe servisu loron loron iha kampu hamutuk ho ita nia komunidade sira atu halo atuasaun ba konflitu ruma, no mos halo atuasaun serbisu ne’ebe mak aas tebe-tebes, para ita bele hamate ka hamenus atuasaun ida ne’ebe uza ho emosaun duke uza ho kakutak,” dehan SEPS Joaquim Gusmão, ba jornalista sira iha Ministeiru Interior,Kaikoli, Kuarta 23/06.
Iha fatin hanesan Komandante PNTL Munisipiu Dili Superintendente, Xefe Hendrique da Costa hateten, ohin membru PNTL na’in 15 lima mai partisipa iha sensiblizasaun ba Jestaun Emosaun, no mos Prevensaun Konflitu ninian no protesaun ba labarik.
“Ita hatene katak ita nia membru PNTL sira ne’e servisu loron loron mak iha kampu, no hasoru komunidade, hasoru envairomentu iha ne’ebe mak diferente, ida ne’e fo kedas impaktu ba iha kualidade servi entendimentu sira nia ba ita nia públiku, tanba ne’e mak sira sira presiza atu jere koñese didiak sira nia an,” nia esplika.
Komandante nia esperansa katak, membru polisia sira ne’ebé mak ohin partisipa iha sensibilizasaun ida ne’e, espera katak sira nia entendimentu iha públiku ne’e diak liu tan, no informasaun ne’ebé mak sira hetan bele fahe tutan fali ba sira nia ekipa para fo entendimentu diak ba komunidade sira.
