Home Notisia Uma kain 590 iha Batara-Laclubar Hetan Estragus Hosi Siklone, Seidauk Hetan Apoiu...

Uma kain 590 iha Batara-Laclubar Hetan Estragus Hosi Siklone, Seidauk Hetan Apoiu Hosi Governu

258
0
Uma Ida Hosi Uma 82 Mak Hetan Efeitu Hosi Dezastre Natural iha Laclubar (Foto: Adroaldo S)

Reportajen Adroaldo ‘Saretuka’

Udan boot ne’ebé akontese iha domingu (04/04/21) kauza hosi siklone tropical seroja, kauza uma kain 590 hetan estragus hadi halakon mos komunidade sira nia sasan, animal no to’os iha Suku Batara, Postu Laclubar, Munisípiu Manatuto.

Ba akontesimentu ne’e komunidade afetadu Antoninho Paulo Soares konfesa katak iha loron 3 no 4 Abril udan boot, iha kalan ne’e sira hahú prepara an, no durante akontesimentu nia lakon animal, to’os no ai-horis sira estraga hotu.

“Hosi animal kesi, animal ne’ebé husik ami ba haree lakon hotu, tanba rai dada hosi foho leten mak tun, ne’ebé, rai dada hotu buat sira ne’e. Pois to’os laran hanesan plantasaun, ai-oan sira ne’ebé estadu fó, ida ami halo rasik bibit, no kuda rasik hanesan privadu ne’e ba hotu”, Haktuir Antoninho ho laran triste.

Nia hatutan ni-nia kafé no ai-oan sira seluk ne’ebé kuda iha rai lolon hodi tahan rai halo metin no atu rai hela ba oan sira nia futuru mos estraga hotu, tanba rai fila tiha ba rai henek mutin.

Antoninho husu atu governu tulun netik sira ba dezastre ne’e, “ami la’os atu obriga governu maibé estadu Timor-Leste hanesan ami nia inan-aman, buat ne’ebé akontese ba ami, depende ba na’i ulun sira tanba plantasaun ne’ebé ami kuda estraga hotu. Atu hakia animal mos ami book an ladi’ak,” nia hatutan.

Iha fatin hanesan komunidade afetadu Terezinha Soares hosi Aldeia Faturah, Suku Batara mos konfesa katak udan boot ne’ebé akontese bee no rai henek tama hotu ba uma no dapur hodi estraga hotu sasan uma laran.

“Foin da-dauk udan ne’e bee tama ami nia dapur ho rai henek. Sasan ne’ebé estraga mak bikan, kanuru, roupa no sasan seluk estraga hotu, tanba ami la konsege aruma. Ha’u nia oan feto nia farda eskola la konsege aruma, be lori no buka la hetan”, haktuir Terezinha.  

Situasaun hanesan akontese ba Xefe Suku Batara, Tomas Pinto, haktuir akontesimentu ne’ebé akontese estraga maioria komunidade iha Suku refere nia uma, plantasaun no animal sira.

“Iha suku Batara hahú iha dia 3 no 4 Abril, iha kalan boot tama ba tuku 2 ho balu, mota tuun sobu komunidade sira nia uma no ai-horis. Sira ne’ebé afeta liu mak uma ne’ebé rahun hamutuk uma kain 82. Sira ida ne’ebé afeta naton no ba ai-horis ho animal ita konta total mak uma kain 590,” Tomas hatutan.

Nia hatutan mos katak dezastre ne’e estraga liu ba komunidade sira nia animal hanesan karau, bibi, kuda, manu, fahi. Estraga mos dapur, haris fatin ho sasan seluk. Nune’e mos estrada iha aldeia haat ne’ebé sirkula iha suku Batara no bee matan sira hetan estragus hotu.

Nia husu atu governu tau matan ho emerjsia ba problema ne’ebé nia komunidade sira hasoru tanba afeita boot tebes.

“Ami la tane liman ba estadu maibé ami tane liman ba to’os ne’ebé ami halo ba, mais to’os sira ne’e komesa tun hotu, pasensia ami mos tenki tane liman ba estadu atu ajuda netik buat balu ba ami durante tinan ida ho balun, tanba ai-horis ne’ebé ita kuda tinan ida mos ami seidauk han. Ai-farina, talas ka fehuk atu kuda mos kuda de’it iha rai henek leten, dala ruma moris ladi’ak no han tempu naruk”.

Nia hateten katak durante akontesimentu ne’e seidauk hetan apoiu ruma hosi governu, maibé hosi de’it intektual Laclubar oan sira hanesan foos saku 24, mina ho supermie ba uma kain 24 de’it. “Ha’u hanoin uma kain 590 ne’ebé bele hetan netik apoiu ruma hosi estadu”.

Hosi akontesimentu ne’e leader suku ne’e buka ona dalan hodi kontaktu ba administrador, juventude estudante sira iha Lacluba no mos Díli hodi buka ne’etik apoiu ruma, maibé apoiu hirak ne’e iha hela prosesu nia laran.

Lider Komunitáriu ne’e hateten katak dezastre ne’ebé akontese afeta boot liu mak estrada ne’ebé sirkula iha suku Batara, Bee ne’ebé estragus iha aldeia haat iha suku nia nia laran, ai-horis komunidade nian hanesan tua, au no sleuk tan. Uma kain ida iha to’os ida ka rua mak hetan estragus tanba rai halai.

Dezastre naturais ne’ebe foin akontese dadaun halo ema barak lakon sasan, lakon riku soin, lakon uma, no lakon membru familia. Dadus hosi Sekretaria Estadu ba Protesaun Civil (SEPC) fo sai katak total ema mate no lakon vida hamutuk 45. Eventu ida ne’e halo ema 25,000 resin mak sai hetan impaktu negativu. Sira hela iha centru deslokasaun sira mak organiza hosi parte igreja nian, iha governo nia fatin no mos iha fatin sira mak iha komunidade nia let.

Print Friendly, PDF & Email

LEAVE A REPLY

Please enter your comment!
Please enter your name here