Reportajen Francisco JDA
Komemorasaun loron FALINTIL 20 Agostu ne’ebé besik daudaun, Falintil – Forsa Defeza Timor Leste ( F-FDTL) sei hala’o tour Falintil ho tema Dalan ba Dame, ho nia objetivu atu vizita fatin istóriku sira kona ba asaun golpe kontra golpe ne’ebé bolu Guera Civil ne’ebé akontese iha territóriu nasionál, no sei tau plaka iha fatin istóriku sira ne’e
Iha konferensia imprensa Estadu Maior Koordenadór ba komisaun 20 Agostu 2021, Tenente Koronél infantaria, Constantino Moreira ba jornalista sira hateten tour Falintil sei hahú iha loron 15 Agostu 2021, hahú hosi kuartél Geral Fatuhada, ba Palapasu kontinua ba Municipiu Manatutu, Baucau, Lautém, Viqueque, Same fila hikas mai Dili iha loron 19 de Agostu hodi halo preparasaun ba kompetisaun loron Falintil iha Kuartél Geral Fatuhada Dili, nune’e iha loron 25 de Agostu tour kontinua tan ba Municipiu Liquisa, Maliana, Covalima, Ainaro no Aileu no loron 29 Agostu tour sei fila mai Dili.
“Komisaun hakarak hato’o ba povu doben Timor-Leste tomak katak atu bele akompaña direita atividade serimónia solene ne’ebé sei hala’o iha kuartél Jeral Fatuhada, ” hatete Tenente koronel infantaria Constantino Moreira iha Kuarter Geral Fatuhada, 13/08
Tenente Koronél infantaria informa tan Tour Falintil ne’e sei halo mós plaka ba fatin istóriku sira hodi nune’e bele identifika no memoriza nafatin.
