Reportajen David da Costa Gusmao
Ministeriu Saude (MS) liu husi Sala Situasaun Centru Integradu Jestaun Krize (SS-CIJK) ohin rejista kazu foun hamutuk ema nain 532, iha Dili 298, Munisipiu Baucau 90 no Covalima 75, no ohin mos timoroan na’in 2 mate ho Covid-19, iha sala izolamentu Vera ruz no kazu óbitu sae ba 51.
Koordenador Forsa-Tarefa ba Prevensaun no Mitigasaun Surtu Covid-19 iha Timor-Leste, Dr. Rui Maria de Araújo, informa ohin 24 Agostu 2021 deteta kazu foun hamutuk ema nain 532 iha Dili 298, Munisipiu Baucau nain 90, Covalima nain 75, Ainaro nain 9, Bobonaro nain 15, Ermera nain 1, Lauten nain 4, Liquiça 12, Manatuto nain 3, Manfuhai nain 12, Viqueque nain 6 no RAEOA nain 7, no munisipiu ida ohin laiha kazu foun mak Aileu.
“Husi total kazu detetadu foun ohin ne’e mane 335, no feto 197. Hus kazu detetadu foun hirak ne’e ho idade tinan 20 nain 122 (23,8%), idade entre tinan 12-59 na’in 393 (73,68%), ho idade 60 nain 17. kazu detetadu ohin ne’e 202 kazu ka 38% maka sintomátiku ka hatudu sintoma,” Dr. Rui esplika liuhusi komunikadu imprensa ne’ebe Neon Metin asesu iha loron, Tersa 23/08.
Nia haktuir husi kazu detetadu foun ohin ne’e 81 (15%) iha ona vasina kompletu no 146 (27%) hetan ona vasina doze dahuluk.
Ba kazu rekuperadu ohin relata nain 97, total kazu ativu ohin nian hamutk 3816 no total kazu konfirmandu kumulativu husi 21 Marsu 2020 to’o ohin loron 24 Agusto 2021 hamutuk ema nain 14935
Dr. Rui explika ba kazu óbitu nain 2, Feto ho idade tinan 35 timoroan, hela iha Dili, seidauk vasina. Iha 22 Agostu 2021, diagnóstikadu sindroma insufisiénsia respiratória aguda (SIRA) tanbá Covid-19 (PCR pozitivu, CT Egene 22), no hahú halo tratamento iha Lahane, iha loron ne’e kedas. Ohin dader matebian iis-kotu iha oras 05:10 dader.
Nia salienta, matebian ida seluk Mane idade 65, hela iha Dili, seidauk vasina. Iha 23 Agostu 2021, diagnóstikadu sindroma insufisiénsia respiratória aguda (SIRA) tanbá Covid-19 (Rapid Antigen Test Pozitive), no hahú halo tratamentu iha Lahane, iha loron ne’e kedas, no ohin lorokraik matebian iis-kotu iha oras 15:20.
Nia dehan, Husi horiseik mai ohin loron 24 Agostu tinan ne’e, Laboratóriu Nasionál Saúde halo testes Polymerase Chain Reaction (PCR) hamutuk ema nain 1388 iha Dili, no horseik iha munisipiu sira seluk, REAOA ho HNGV halo teste PCR ba ema hamutuk ema na’in 506.
