Reportajen David da Costa
Tribunal Judisial Primera Instansia Dili (TJPID), liu husi despaisu ikus ba prosesu primeiru interogatoriu, deside aplika medida Aprezentasaun Periodika (AP) ba Reitór Universidade Nasionál Timor Lorosa’e (UNTL) no Termo Indentidade Rezidensia (TIR) ba arguidu na’in lima.
Arguidu na’in neen ne’ebe maka Tribunal Judisial Primera Instansia Dili fó AP no TIR maka hanesan, Retór UNTL João Soares Martins, arguidu FQdC, arguidu TS, arguidu MB, arguida JMM no mos LSdA.
Juiz Turnu Arjentino Nunes liu husi despaisu ikus iha loron Sabado 17/01/2026, deside aplika medida Aprezentasaun Periodika (AP) no medida Termu Indentidade Rezidensia (TIR) ba Reitor UNTL João Soares Martins.
No arguidu na’in lima seluk, FQdC, TS, MB, JMM no LSdA, Tribunál deside aplika medida Termu Indentidade Rezidensia (TIR).
Hafoin despaisu husi Tribunál, tuir Advogadu Privadu Arlindo Sanches deklara katak, nia asistidu hanesan Dekanu hetan medida TIR.
“Hau nia asistidu hetan medida TIR, tanba ne’e ha’u mos aseita ho medida ne’e, “Dehan Advogadu Privadu Arlindo Sanches ba jornalista sira iha Tribunál Judisiál Primeira Instánsia Dili Kaikoli, Sabadu 17/01.
Alende nee, Advogadu Privadu Napolião de Olivera Carvalho mos haktuir, nia fó asistensia ba asistidu na’in rua, maibéhetan hotu medida TIR.
“Asistidu na’in rua ne’ebe ha’u fó asistensia ba, ida Dekanu no ida foin lalais baixa hela iha Hospital ne’e, “Dehan Nia.
Alende ne’e, Defensor Publiku, Anzelmo Akara mos deklara katak, nia asistidu mos hetan medida TIR, tanba ne’e konkorda ho despaisu Tribunál nian.
Antes ne’e, iha alegasaun ba prosesu ne’e, Prokurador Turnu Matias Soares deklara katak, husu Tribunal atu aplika medida Proibisaun de Auzensia no Medida Aprezentasaun Periodika ba arguidu na’in tolu hanesan, Reitor no Dekanu nain rua. Enkuantu ba arguidu na’in tolu seluk, Ministeriu Publiku husu Tribunal atu aplika Medida Aprezentasaun Periodika (AP) no medida Termo Indentidade Rezidensia (TIR) ba arguidu na”in tolu.
Alende ne’e, iha alegasaun husi parte Advogadu Privadu, no Defensor Publiku arguidu sira nian, husu Tribunál atu aplika medida Termu Indentidade Rezidensia (TIR) ba arguidu sira.
Depois alegasaun, Defeza Cansio Freitas deklara katak, iha alegasaun nia parte husu TIR.
“Husu TIR de’it, tanba MP husu aprezentasaun Periodika, promosaun ne’ebe MP aprezenta mai ne’e jeral de’it, la espesifiku krime saida maka imputa ba sira,”nia dehan.
Tanba iha deklarasaun arguidu sira nian deklara katak, la iha indisus forte atu prense rekejitus, kona-ba dono ba kazu ne’e.
Prosesu ne’e, prezide husi Juiz turnu Arjentino Nunes, Ministeriu Publiku reprezenta husi Prokurador Matias Soraes, no arguidu na’in lima hetan asistensia legál husi Advogadu Privadu no Defensor Publiku.
Rekorda fali katak, Polisia Nasional Timor-Leste (PNTL), liu-husi Diresaun Servisu Investigasaun Kriminal Nasional ezekuta mandadu Tribunal Judisial Primeira Instansia Dili (TJPID) ho NUC 086/25-PNSIK hodi halo buska, apreensaun no detensaun ba Reitór Universidade Nasionál Timor Lorosa’e (UNTL) João Soares Martins no dirijente nain lima.
Diresaun Servisu Investigasaun Kriminal Nasional ezekuta mandadu Judisiál hodi halo buska, apreensaun no detensaun nee, relasiona ho violasaun balu neebe akontese iha tinan 2024.
