Reportajen David da Costa Gusmao
Ministeriu Saude (MS) liu husi Sala Situasaun Centru Integradu Jestaun Krize (SS-CIJK) ohin rejista kazu foun hamutuk ema na’in 361, no iha nain ida mate ho COVID-19 iha sala izolamentu Vera Cruz.
Koordenador Forsa-Tarefa ba Prevensaun no Mitigasaun Surtu Covid-19 iha Timor-Leste, Dr. Rui Maria de Araújo informa ohin 25 Agostu tinan ne’e, deteta kazu foun hamutuk ema nain 361, iha Dili 270 , Baucau nain 28, Bobonaro nain 12, Ainaro nain 10, Covalima nain 7, Ermera nain 1, Lauten nain 4, Manatuto nain 8, Manufahi nain 7, RAEOA nain 6, Viqueque nain 8, no munisipiu seluk Aileu ho Liquiça ohin kazu foun laiha.
“Husi total kazu detetadu foun ohin ne’e mane nain 171 no feto 190, total kazu detetadu foun hirak ho idade tinan 20 nain 65 (18%); ho idade entre tinan 12-59 nain 272 (75,3%), ho idade 60 nain 24, no kazu detetadu foun ohin ne’e 137 kazus ka 38% maka sintomátiku ka hatudu sintomas,” Dr. Rui esplika liu hosi komunikadu imprensa ne’ebé Neon Metin asesu iha loron, Kuarta 25/08.
Nia dehan husi kazu detetadu foun ohin nain 117 (32%) iha ona vasina kompletu no 32 (9%), hetan ona vasina doze dahuluk. Kazu rekuperadu relata ba ohin loron hamutuk 124, total kazu ativu ohin hamutuk 4,052 no total kazu konfirmadu kumulativu sura husi loron 21 Marsu 2020 to’o ohin loron hamutuk ema na’in 15.296.
Dr. Rui mos informa katak Ministeriu Saude rejista tan obitu nain ida, no total obitu sae ba 52. Óbitu ida ohin ne’e ho sexu feto, idade 55 timoroan, hela iha Dili, seidauk vasina. Iha 23 Agostu 2021 diagnostikadu sindroma insufisiénsia respiratória aguda (SIRA) tanbá Covid-19 (PCR pozitivu, CT Egene29), no hahú halo tratamentu iha Vera Cruz, iha loron ne’e kedas. Matebian iha mós istória sofre moras tuberkuloze, ohin matebian iis-kotu iha tuku 09:10 dader
“Familia ohin kordena hela ho ekipa saúde sira atu hala’o funeral tuir protokolu ne’ebé adopta ihaTimor-Leste,” nia dehan.
Husi horseik mai ohin loron 25 Agostu tinan ne’e, Laboratóriu Nasionál Saúde halo testes Polymerase Chain Reaction (PCR) hamutuk ema na’in 758 iha Dili no horseik iha munisípiu sira seluk, RAEOA ho HNGV halo teste PCR ba ema hamutuk ema na’in 509.
