Reportajen Santina Lucia da Costa
Sekretaria Estadu ba Igualdade no Inkluzaun (SEII), hamutuk ho parseiru sira komesa halo diskusaun hodi define asaun estratéjiku, atu reforsa lideransa feto iha polítika no preparasaun ba iha eleisaun prezidensiál, eleisaun parlamentár, eleisaun Munisípiu no eleisaun suku.
Liuhusi workshop nasionál ho tema “Hametin Partisipasaun Feto iha Eleisaun” ne’ebe mai husi, Grupu das Mulheres Parlamentares de Timor-Leste (GMPTL), Movimentu Feto Foinsa’e (MOFFE Timor-Leste), PATRIA no CAUCUS.
Sekretaria Estadu ba Igualdade no Inkluzaun (SEII), Maria José da Fonseca Monteiro de Jesus hateten, workshop ida ne’e parseiru sira hamutuk sei fahe hanoin, reprezentante komunitária sira, esperiénsia ne’ebé sira iha dezde tinan 5 ona, sira mai hotu fahe hanoin, aleinde maluk sira husi sosiedade sivíl hanesan Caucus, Patria, Plan Internasionál, MOFFE no mós parseiru sira seluk.
“Agora daudaun ekipa sira halo serbisu maka’as ida, ekipa ida iha esperiénsia tiha ona, serbisu iha eleisaun dala hira ona, no iha tinan 5 ba kotuk mai ho kampaña 100% prontu, ohin ita halo abertura ba workshop iha nivel nasionál ita loke ona dalan ba preparativus seluk, aleinde nivel nasionál iha mós ba iha munisípiu sira no mós iha RAEOA, hodi hakat ba hasoru eleisaun Prezidensiál, Lejizlativa parlamentár, no mós ba iha eleisaun suku.” dehan SEII ba jornalista sira iha salaun Delta Nova, 27/9.
Maria José da Fonseca Monteiro de Jesus deklara agora daudaun husi ekipa seidauk ofisiálmente hetan informasaun katak, iha tan ema seluk ne’ebé atu ba kandidata, maibé ita hatene ona katak, Armanda Berta husi partidu KHUNTO publikamente hatete sai ona, nia sei ba kandidata-an ba iha Prezidente Repúblika kompete iha eleisaun tinan oin.
“Ita hatene katak feto barak potensialidade atu ba iha kargu ida ne’e, klaru ké ita nia sistema patriarkar ne’ebé sei sai obstakulu boot ida, ita sei hasoru dezafius barak, maibé hau fiar katak serbisu hamutuk, apoiu husi media ita bele sei bele hetan susesu maka’as, ekipa halo esforsu serbisu maka’as.” Haktuir, Maria José da Fonseca Monteiro de Jesus.
Iha fatin hanesan Diretora Fundasaun CAUCUS Feto iha Polítika, Teresina Maria Noronha Cardoso akresenta, ita haree ba partisipasaun feto, sira komesa ativu ita haree mós progresu lubuk ida, ita haree aspetu polítika, haree mós husi aspetu sira seluk, feto nia envolvimentu maka’as la halimar, ita haree ba númeru seidauk iha balansu entre feto ho mane 50%, maibé ita iha prosesu no dalan ida atu hakbiit nafatin feto ninia kapasidade, feto ninia lideransa atu nune’e feto sira komesa brani atu kandidata sira nia-an.
Nia dehan feto maluk sira, labele ansi harii lalais uma-kain, se hanoin harii lalais uma ka’in, ne’e fatór ida impede matenek ne’ebé sira iha para sira bele kontribui dezenvolvimentu nasaun ida ne’e, ne’ebé fó impaktu ba ema hotu.
Tuir dadus husi SEII númeru partisipasaun feto iha Parlamentu Nasional atinje 40%, ezekutivu iha governu nia laran feto iha 16%, lideransa komunitária xefe suku sa’e ba 5%, no xefe aldeia sa’e to’o 4%.
