Home Justisa FONGTIL Publika Karta Aberta Husu Presidente Firmi Hili Governante Mak Moos

FONGTIL Publika Karta Aberta Husu Presidente Firmi Hili Governante Mak Moos

1120
0

FONGTIL husu ba Presidente da Republika atu kontinua hatudu ninia seriedade hodi fo pose deit ba potensia governante neébe iha moral, hahalok diak no moos Husi Alegasaun Kualker Krime. Iha Karta Aberta ne’e FONGTIL mos hato’o rekomendasaun ba Presidente da Republika, Governo, no Partido Pulitiku sira.

Iha Karta Aberta FONGTIL nian, ne’ebe publika tiha ona hodi kontrbui ba hakotu inserteza politik ne’e haktuir katak FONGTIL sei kontinua luta ho hamrik metin nafatin iha baze boa governasaun no justisa sosial.

“FONGTIL ho nia membrus sei la hakiduk pasu ida hodi luta ba defende valor hirak neé no prontu fo apoiu masimu ba Organu Soberania ka Liders ruma neébe iha vizaun atu defende valor sira mak mensiona iha leten. Organizasaun Sosiedade Sivil sira hakarak governador sira sai exemplar ba sosiedade, Ema ne’e Tenke Moos no Los. Tanba ne’e, sosiedade sivil nia luta mak kontinua husu ba Presidente da Republika atu kontinua hatudu ninia seriedade hodi fo pose deit ba potensia Governante neébe iha Moral, Hahalok Diak No Moos Husi Alegasaun Kualker Krime.” Karta Aberta ne’e Neon Metin asesu via email, horiseik 13/08.

Iha karta ne’e, FONGTIL nudar organizasaun salurik ba ONG sira no nudar organizasaun naun-governmental mak servisu besik liu ba povo, FONGTIL husu, “Prezidente da Republika, ba Primeiru Ministru no Partidu Politiku sira atu halo esforsu maka’as liutan hodi hakotu tiha Inserteza Politik ne’e be lao hela dadaun. Sosiedade Sivil ninia observasaun nota hela katak situasaun ekonomia komesa negativu ba bebeik, friksaun politik kroak ba bebeik, no vida sosial hahu hatudu tensaun iha relasaun sosial sira. Situasaun hirak ne’e, diak tebes ba parte terseiru sira, tanba interese poder no ekonomia, bele uza hodi halo bo’ot problema ne’ebe loloos ne’e bele resolve.”

Karta Aberta ne’e mos fo rekomendasaun importante 6, sira ne’e mak; Ida,FONGTIL apresia tebes ba  povu nia maturidade politik no povu nia maturidade ne’e fo ona lisaun diak ba ita nia lideres sira. FONGTIL kontinua apela ba sidadaun hotu atu mantein ita nia maturidade hodi kontribui ba paz no estabilidade, no lalika monu ba manobra politika  neébe deit, tamba manobrador politik sira sei uza ita povu interese hodi atinzi sira nia objetivu ba puder ukun nian; Rua,VIII Guvernu Konstitusional atu foka ba Orsamentu Anu 2018 neébe agora da-daun iha ona Parlamentu Nasional no garante katak orsamentu ne’e bele responde ba situasaun sosial no ekonomia mak oras neé povu infrenta; Tolu,Mensagen ba Partido Politik neébe hetan asentu iha Parlamentu Nasional atu para ona hoita boót sira nia egoismu politika, hodi konsentra ona ba Orsamentu Ano 2018 neébe agora da-daun iha ona ita bot sira nia liman; Hat,Husu ba Sua Exelensia Prezidente da Repúblika uza kompetensia tomak atu tetu didiak, tuir Direitu Konstitusional no Promulga/La Promulga Orsamentu Tinan 2018, hodi nune’e la fo implikasaun negative ba situasaun  sosio-ekonomia no politika mak frajil hela iha oras ne’e dadaun; Lima,FONGTIL apresia ho ita nia Forsa 2 (rua) F-FDTL no PNTL tamba hatudu duni sira nia professionalizmu iha situasaun inserteza Púlitikaida neé. FONGTIL fiar metin iha instituisaun rua neé nia servisu no mantein nafatin profesionalizmu ida neé wainhira atua situasaun ruma; Neen,Husu ba membru ONGs tomak iha teritorio Timor-Leste laran tomak, atu kontinua sensibiliza komunidade atu labele monu ba manobra politika Puder nian. Tanba FONGTIL haree katak, povo nia partisipasaun iha manobras politik sei halo klean liutan inserteza ida ne’e.

Iha karta ne’e nia laran FONGTIL mos hatudu preokupasaun ba efeitu inserteza politik ba moris sidadaun nian. Karta ne’e hatete katak inserteza politik ne’e kontribui ba halo kiak liu ema nia nia moris, la fo konfiansa ba empresariu sira, no halo tun liutan kresimentu ekonomia.

Forum ONG Timor-Leste (FONGTIL) mak Organizasaun salurik ba ONG Lokál, Nasionál no Internasionál ne’ebé eziste iha Timor-Leste ho total membru 348 (Lokal-Nasionál 304 no Internasionál ONG 44). FONGTIL hanesan organizasaun ne’ebé ho karakterístiku la buka lukru, non-partisan, non-sektarian, no sai nudár parseiru kritiku ba instituisaun Órgaun Soberania iha prosesu harii Nasaun. FONGTIL firme ho pozisaun hanesan organizasaun independente hodi hala’o kontrola sosiál no haforsa involvimentu sosiedade sivíl iha prosesu dezenvolvimentu nasionál.

LEAVE A REPLY

Please enter your comment!
Please enter your name here