Home Analisa Ba tuir Pengesahan: Problema mak Arte Marsial ka mak Violensia?

Ba tuir Pengesahan: Problema mak Arte Marsial ka mak Violensia?

1009
0
Atleta Silat Timor-Leste David No-Ano Ximenes kompete iha Asian Games da-5, iha Indonesia (foto: liputan6.com)

Televizaun GMN horiseik kalan publika notisia ida hodi informa ba publik katak Polisia Servisu Investigasaun Kriminal (PSIK) kaptura membru organizasaun Arte Marsiais hosi PSHT nain 31 (Feto 3, Mane 28) tanba ba tuir pengesahaniha Indonesia. Aktu krimi hosi sira nain 31 halo ne’e mak saida? Sira la baku ka oho ema ida, sira ezerse sira nia liberdade da expresaun mak garantia ona iha Konstituisaun RDTL.

To’o agora seidauk iha Lei ida mak dehan hola parte iha organizasaun ka pratika desportu ida ne’e nudar krimi. Bele rekoinese katak iha insidente violensia barak mak involve membru organizasaun arte marsial nian maibe ne’e sira ne’e la signifika sira nia organizasaun mak halo krimi. Bainhira krimi ida akontese, responsabilidade ne’e individu ida halo krimi ne’e. Maibe ba pengesahan, ne’e laos halo violensia, ka demonstra aktu krimi ruma.

Ema hotu hatene hela katak foin lalais ne’e, Timor-Leste haruka ninia atletas sira ba partisipa iha Asian Games iha Indonesia, atletas nain hirak ne’ebe ba ne’e inklui mos atletas artes marsiais nian. Sira nain hirak ne’ebe ba tuir kompetisaun artes marsiais ka silat maioria mai hosi PSHT. Sira ne’ebe ba tuir kompetisaun la hetan kapturasaun hosi polisia, maski sira ne’e pratika artes marsiais abertamente no Governo fo mos osan ba saida mak sira halo. Perguntas mak ne’e, oinsa mak ita bele iha atletas artes marsiais maibe labele iha pratika artes marsiais?

Lei N.º 5/2017 de 19  de Abril, define artes marsiais nudar, “técnicas constituídas por práticas tradicionais, nativas e culturais, memorizadas por rotinas ou padrões, muitas vezes identificadas por modalidades desportivas  e acompanhadas  de  treino de combate,  bem como  os movimentos  corporais criativos introduzidos nessas técnicas que pela sua perigosidade se devam considerar como semelhantes.“Ne’e signifika estadu Timor-Leste rekoinese valores pozitivu hosi arte marsial nian. Peskija desportu barak ona mak komprova transmisaun valores no formasaun karakter hosi involvementu joven sira nian iha atividade arte marsial. Rekoinesementu iha lei ne’e fo vantajen ba dezenvolvimentu arte marsial nudar desportu.

Filozofikamente Arte Marsial kontribui ba dezenvole Isin, mental no personalidade (Body: dezenvolve liu hosi exersisiu fiziku), Kakutak (Mind: dezenvolvimentu mental) no Spiritu (Spirit: dezenvolve personalidade). Tanba benefisiu ida ne’e mak ma rihun ba rihun ona mak pratika artes marsiais iha rai laran, no artes marsiais fo duni benefisiu ba sira nia saude, no moris sosial. Iha fatin sira ne’ebe estadu la marka prezensa/hadir bainhira joven sira presija, organizasaun artes marsiais mak marka prezensa no fo espasu ba partisipasaun ba joven sira.

PSIK kaer sira 31 mak ba tuir pengesahan iha Indonesia ho asumsi katak sira viola lei, la hatene lei ida ne’ebe , no karik sira mos involve iha violensia artes marsiais nian sira mak akontese iha rai laran.  Maibe ema barak haluha tiha katak joven ida laos deit gasta nia tempu ba aprende arte marsial sira, maibe mos buat diak seluk. Oinsa mak treinamentu arte marsial oras 6 semana ida bele kuda hahalok violensia, no eskola oras 20 ka liu semana ida labele kuda hahalok diak iha joven sira ulun no fuan? Entaun persija haree fila maneira buka solusaun ba problema ne’e bolu ka hanaran ‘arte marsial’ ne’e.

Bele fiar ka lae, maibe ita nia aprosimasaun ba problema determina ita nia solusaun ka rekomendasaun ba buka solusaun. Ezemplu bo’ot liu mak establesementu KRAM (Komisaun Reguladora Arte Marsial) no Rezolusaun Governo no.16 ne’ebe hasai iha 2013 hodi bandu organizasaun arte marsial 3, Kera Sakti, KORK, no PSHT. Rezolusaun ne’e halo tanba violensia oin-oin ne’ebe diskonfia involve organizasaun arte marsial 3 ne’e nia membru sira. Liu-liu tanba esforsu oin-oin ne’ebe koko halo ho organizasaun arte marsial sira, nunka hetan susesu. Juramentu hamutuk entre membru no lider organizasaun sira mos halo ona. Juramentu ne’ebe involve membru PNTL no F-FDTL ninian sira ne’ebe involve iha arte marsial mos halo ketak. Hafoin esforsu hirak ne’e hotu, violensia kontinua mosu.

Hosi ezemplu hirak ne’ebe temi ona, no konsidera katak esforsu sira ne’e mak dalan oin-oin, ne’ebe governo halo hodi buka solusaun. Governo ho autor seguransa sira nia aprosimasaun bazeia ba hanoin ida katak problema ne’ebe durante ne’e akontese tanba involvementu joven sira nian iha organizasaun arte marsial. Entaun foku ba solusaun mak organizasaun arte marsial. Aprosimasaun hanesan mos mosu iha ONG sira nia esforsu. Purezemplu, ONG Belun ninia peskija kona ba arte marsial ninia rekomendasaun mos foku ba organizasaun arte marsial. Experiensia hatudu katak aprosimasaun ho ninia foku iha organizasaun arte marsial to’o agora seidauk hetan susesu. Signifka katak aprosimasaun hodi buka solusaun ba problema violensia ne’ebe akontese durante ne’e tenke muda.

Se hanesan ne’e, entaun problema loloos ne mak saida? Violensia mak problema ninia abut, laos arte marsial. Arte marsial ne’e pratika desportu ida ne’ebe ho intensaun atu halo auto-defeza no demonstra arte defesa nian. Bainhira ema ida  hola parte iha pratika arte marsial, aprende ho didiak, no fo hosi treinador ne’ebe iha qualidade, ho sistema kontrolu ida diak hosi estadu, sei ajuda ema ne’e atu hetan saude diak, fiar an liutan, no bele produtivu liutan iha ninia moris.

Los duni, iha pratika arte marsial nia laran, iha lisaun kona ba tuku, tebe, uza instrumentu ataka no salva an ho maneira oin-oin. Tekniku sira ne’e hotu hanorin ho intensaun atu ema ida-idak bele salva nia an uza tekniku ne’ebe nia aprende. Maibe konsiderasaun persija fo mos ba tendensia hodi uza tekniku sira ne’ebe aprende atu halo ataka ba ema seluk, laos deit atu defende an. Maibe tendensia ida ne’e bele akontese mos ba disiplina sira seluk. Maski guru/profesores hanorin buat diak maibe alunu bele uza sala saida mak professor hanorin.

Hosi insidente violensia lubuk ida ne’ebe publika iha media no rezultadu peskija sira, la iha ida mak indika ka fo sai katak prepetador sira uza tekniku arte marsial nian hodi ataka malu. Ezemplu hosi akontesementu iha Likisa, iha fulan Febreiru 2016 nian, prepetrador sira ataka malu ho katana no sunu uma. Ataka malu ho katana bele konsidera nudar indikasaun ida katak prepetrador, karik uza teknik ruma iha arte marsial nian. Maibe ne’e mos persija haree fali oinsa maneira sira uza katana hodi taa malu. Tanba ita nia sosiedade ne’e, membru komunidade sira sempre uza katana ba to’os, no sira hatene oinsa mak atu taa ai ka taa nan ho diak. Ida ne’e la persija aprende hosi mestre arte marsial ruma. Maibe sunu uma? Ne’e la hatene klube arte marsial ida ne’ebe mak hanorin teknik ida ne’e. Konserteza ne’e laos lisaun arte marsial nian.

Solusaun diak liu mak husik ba pratika violensia ne’e organizadu iha klube ka organizasaun desportu sira, ih boxe, no artes marsiais. Publik presija taka dalan ba attitude no hahalok violensia durante ne’e akontese iha eskola, iha publik, iha media visual sira no iha uma. Importante liu, atu hakotu sirklu violensia ne’e mak persija iha aprosimasaun structural. Signifka persija taka dalan hotu-hotu ne’ebe loke opurtunidade ba violensia hodi akontese, tuir dalan structural ninian. Iha dalan ida ne’e, mosu fiar ida katak, violensia la mosu mesak, violensia akontese tanba kauza social, kultura, ekonomia no relasaun ho poder. Iha structural approach ema labele foku deit ba vitima maibe mos ba prepetrador sira. Ne’e atu komprende oinsa prepetrador aprende no halo violensia.

Violensia sira ne’ebe akontese durante ne’e, analizador balun dun ba familia nudar edukador ne’ebe falla, balun fali dun ba eskola, tan la konsege hanorin ho diak. Maibe responsabilidade bo’ot liu ba hakotu sirklu violensia ne’e mak estadu. Iha estadu Timor-Leste, opurtunidade ba violensia publik bo’ot teb-tebes. Bele nota katak populasaun aumenta ba bebeik, liu-liu numeru populasaun juventude nian. Eskola sira ladun fo opurtunidade atu joven sira atu aprende ho diak no aprende la uza/imita violensia. Opurtunidade ekonomia sei menus los, maibe joven sira tama ba forsa traballu 15 mil to 20 mil kada tinan. Presaun ekonomia hatodan moris familia nian, no halo todan liutan relasaun ema ho ninia rekursu naturais. Numeru ema aumenta maibe numeru ai-han la aumenta no numeru rai la aumenta.

Situasaun sira ne’e hotu sei kontinua la diak, bainhira estadu seidauk iha kapasidade naton hodi hatan ba nesesidades baziku ema hotu ninian. Aat liutan, ho kondisaun social ne’ebe frajil hanesan ne’e, estadu ninia foku dezenvolvimentu ba fali area infraestrutura duke area social (edukasaun, saude, no nesesidades baziku sira seluk). Dalan uniku hodi hakotu violensia arte marasial no violensia publik sira seluk ne’e durante ne’e akontese mak hadiak hikas maneira hodi responde ba violensia arte marsial. Simplis liu, tuir dalan structural ida mak hadiak sistema edukasaun. Halo luan definisaun edukasaun, labele limiti deit ba eskola, maibe mos ba klube desportu sira. Estadu persija obriga atu edukasaun desportu hotu-hotu persija iha kurikulum hanorin nian, inklui klube arte marsial sira. Kurikulum hotu-hotu persija hetan aprovasaun hosi Ministeriu Edukasaun antes hanorin. Dezenvolve sistema kontrolu ida hodi garante katak sistema aprendizajen iha klube ka organizasaun desportu sira tuir duni standar edukasaun ne’ebe estadu termina.

Timor-Leste persija iha edukasaun ida diak, ho qualidade, asesivel, inkluzivu no halo ema kore-an hosi ukun ladiak nian mak dalan ida ba hakotu violensia. Persija kria ambiente moris komunidade ida ne’ebe edukaitivu mos, hodi halo edukasaun sai buras liutan. Tan maioria joven sira, laos moris  too bo’ot, no dezenvolve an iha familia ka eskola deit, maibe mos iha komunidade, no ambiente ne’ebe joven sira hola parte ba. Hadiak ka kria ambiente ne’ebe edukativu ba joven sira, liu-liu bainhira sira la tama ba edukasaun formal nian (eskola, asosiasaun siviku, no klube desportu) mak dalan holistiku hodi hases joven sira hosi hahalok la siviku, inklui hases sira hosi violensia.

LEAVE A REPLY

Please enter your comment!
Please enter your name here