Home Meio Ambiente Lixu Fatin La Iha, Mota Comoro Sai Fatin Lixu Ba Aldeia Fomentu...

Lixu Fatin La Iha, Mota Comoro Sai Fatin Lixu Ba Aldeia Fomentu II

59
0
Foer tun hosi mota ba tasi (Foto: Suara.com)

Reportajen Adroaldo ‘Saretukau’ & Lucas ‘Hagho’

Mota kontinua sai fatin lixu ba komunidade ne’ebe seidauk iha fatin lixu. Aldeia Fomentu II, iha Suco Comoro seidauk iha solusaun ba problema ne’ebe sira hasoru dadaun hela. Komunidade kontinua soer foer ba mota. Mota sei lori foer sira tun ba halo foer tasi no fo impaktu liutan ba ambiente tasi no mos ba ema nia moris.

Xefe Aldeia Fomentu II, Imaculado da Conceição Doutel Perreira esplika katak komunidade soe foer ba mota Comoro tanba fatin soe lixu seidauk iha. Foin dadaun Xefe Aldeia sira enkontru iha Suco ona hodi haree posibilidade atu konstroe fatin soe foer iha kada aldeia.

“Ami  iha ne’e fatin lixu seidauk iha ka sedauk estabelese fatin hodi ami ho komunidade sira bele tau foer iha fatin, só iha de’it besik eskola ne’ebá maka iha no komunidade barak ba soe foer iha ne’ebá. Iha ne’e iha komunidade barak no joven sira mós hakarak halo fatin lixu atu bele tau foer, maibé tamba de’it fatin maka la iha atu halo lixu fatin  hodi  tau fo’er, “ Imaculado esplika ba Neon Metin iha sira nia hela fatin, loron hirak liuba 30/03.

Xefe Aldeia ne’e konta tuir katak sira foin halo enkontro iha Suku ho PNDS atu bele estabelese fatin lixu iha Suco Comoro Aldeia sanulu resin haat (14 ) no iha kada Aldeia atu bele estabelese fatin lixu  tolu ka haat atu bele tau lixu. Tamba dadaun ne’e sira hotu nia preokupasaun maka ambiente katak ita nia ambiente la fó saudável ba ita tamba de’it fatin lixu la iha no ema balu la iha konsiénsia hodi tau fo’er ba nia farin no soe fo’er arbiru de’it.

“Iha fatin ida ne’e ami hosi Aldeia  Fomentu II kuaze komunidade barak maka ba soe de’it fo’er iha área mota Comoro ni-nin. Bainhira haree fatin lixu ida de’it ne’e nakonu ona ka barak liu, sira balun ba soe iha mota ni-nin. Sira sempre hirus malu ho komunidade ne’ebé hela iha mota ni-nin tamba de’it soe lixu besik liu iha sira nia uma sorin no sira ne’ebé soe fo’er ba mota laran sei ko’alia ba komunidade ne’ebé hela iha mota ni-nin dehan ida ne’e la’os imi nia hela fatin  maibé ida ne’e mota laran, “ Xefe Aldeia Imaculado aumenta.

Jornalista Neon Metin observa katak iha Aldeia Fomentu II estrada di’ak no kuaze ema emprezáriu barak mak hela iha ne’e. Ema emprezáriu sira ne’e maka kria rasik sira nia fatin hodi tau lixu maibé  komunidade sira ne’e  la iha.

Nune’e mós iha Aldeia Fomentu II ida ne’e komunidade barak maibé fatin lixu maka rua ne’e de’it. Komunidade sira tau de’it  fo’er iha karon no balun maka tau iha karosa maibé kuandu iha tempu udan dalaruma sira fakar fali ba valeta laran atu bee bele lori ba fatin seluk. Tamba hirak ne’e hotu maka agora dadaun iha ona planu atu bele halo fatin lisu haat iha Aldeia Fomentu II  hodi nune’e redus tiha fo’er sira ne’ebé namkari iha fatin fatin.

Membru komunidade Fomentu II, Manuela Soares da Silva Viegas expersa katak fatin lixu no distansia fatin lixu sai preokupasaun komunidade nian. Tanba ne’e komunidade hili soe deit ba mota laran.

“Ami iha ne’e kuaze ema hotu ba soe fo’er iha lixu fatin besik eskola nia oin tamba fatin ne’ebá maka besik liu ona ami no fatin ne’e maka tau lixu fatin. Maibé iha ema balun ne’ebé maka dok liu no sira ne’ebé maka hela besik mota ni-nin entaun sira ba soe de’it iha mota laran no iha tempu rai udan maka be lori hotu ba tasi nune’e halo tasi no mota sai foer liu tan de’it, “ Manuela expresa.

Membru Komunidade Fomentu II, Azio Soares hato’o liafuan hanesan. Nia refere mos ba dalan hodi lori foer ba soe mos araska.

“Ami la ba soe iha fatin lixu ne’ebé dook liu, só ema balun de’it maka ba soe iha lixu fatin tamba sira iha gerobak, ami ne’ebé gerobak la iha ami la ba soe iha fatin dook  tamba ami presija tempu barak hodi la’o atu soe de’it fo’er ne’e mak ami tenke soe de’it iha mota laran. Ami atu ba soe iha lixu fatin iha dalan boot mos susar tamba komunidade hela rabat malu liu, atu lori ita nia lixu iha karon no gerobak mos arask, ne’e mak ami mao soe de’it iha mota laran, tamba ami sai mai kotuk langsunng fakar de’it, “ Azio hatete.

Azio mos dehan katak autoriedade lokal la hare sira tamba dehan ida ne’e área mota laran ne’ebé autoridade la presija tau atensaun nune’e ema barak iha ne’e hotu-hotu mai fakar de’it fo’er iha mota laran. Maske iha lixu fatin ne’ebé maka estadu tau ona besik eskola primária Fomentu II ne’ebá.

Maski halo buat sira hotu komunidade sira hakarak fo’er sira ne’e la ba tasi hodi halo ita nia ambiente fo’er liu tan. Sira mos hakarak ita moris tenke iha ambiente ne’ebé mós maibé ita nia mota laran tenke mós atu ema seluk hare  ida ne’e di’ak.

LEAVE A REPLY

Please enter your comment!
Please enter your name here