Home Justisa RBR Sosializa Lei Ba Rai, Rai 20 Ital Hektares Iha Betano Mak...

RBR Sosializa Lei Ba Rai, Rai 20 Ital Hektares Iha Betano Mak Seidauk Indeminiza

113
0
Rede Ba Rai Halo Sosializasaun konaba Lei ba Rai iha Betano. [Foto: Copyright Media RBR | 04.10.2019]

Reportazen Zevonia Vieira 

“Iha parsela 20 ital mak seidauk konsidera husi parte estadu tamba ne’e ita esforsu atu buka dalan atu bele responde ba komunidade afeitadu sira ne’ebe sei iha parsela mean”. Xefe Suku Betano

Rede ba Rai liu husi nia departamentu Edukasaun Legal no Mobilizasaun Masa disemina lei ba rai ba komunidade iha Suku Betano.

Kordenador Nacional Rede ba Rai, Hortencio Pedro Vieira iha nia intervensaun hateten katak assuntu rai ne’e importante ba komunidade sira, atu hatene sira nia direitu tuir Lei No 13/2017, tanba assuntu rai ne’e mos dala barak sai kauza ba problema ne’ebe sosiedade barak hasoru,

“Ohin loron Rede ba Rai marka prezensa iha ne’e nu’udar parte ida husi serbisu rede nianm atu sosializa lei ba rai ba komunidade sira iha Betano”, hateten Hortencio, 23/09/19.

Iha sosializasaun Lei ba rai ne’e komunidade sira hato’o sira nia prekupasaun kona ba atu hetan sira nia direitu ba rai no oinsa atu hetan rekonhesementu legal tuir Lei ba rai nebe’e mak iha.

Komunidade sira mos hato’o sira nia preokupasaun kona ba projeitu refinaria ne’ebe governu planu atu hari’i no iha komunidade nain ba rai hamutuk uma kain 22 mak governu seidauk indeminiza.

Reprezentante komunidade afeitadu, Zeca Pereira husi Suco Betano, Aldeia Bemetan hateten katak husi rai ne’ebe mak governu identifika mais ou menus hektares 230 depois de prosesu reverifikasaun, balun indeminiza ona maibe nia rai ho total hektares 1 metru 50 governu seidauk indeminiza ho razaun la iha dokumentus ne’ebe forte.

“Projeitu refere iha 2020, agora governu iha ona planu atu hahu ona serbisu konstrusaun fiziku no momentu ne’eba tuir konkordansia ne’ebe iha katak ami sei hetan rekompensasaun husi governu ba ami nia rai ne’ebe afeitadu, to’o agora nia prosesu lao hela maibe ami seidauk rona nia kontinuasaun”, tenik Zeca

Hatan ba ida ne’e Xefe Suco Betanu, Felipe de Araujo rekunhese katak mais ou menus iha parsela 20 ital mak seidauk indeminiza no agora dadauk nia prosesu sei lao hela.

“Planu governu nian atu hari’i refinaria iha Betano ne’e molok hau nia mandatu no prosesu lubuk mak lao ona hahu’u husi identifikasaun, reverifikasaun lao hotu ona, kontratu mos asina ona, no hein deit pagamentu. Maibe sei iha parsela 20 ital mak seidauk konsidera husi parte estadu tamba ne’e ita esforsu atu buka dalan atu bele responde ba komunidade afeitadu sira ne’ebe sei iha parsela mean, no ita nia karta mos ba to’o ona Sekretariu Estadu iha ona konfirmasaun husi Timor Gap no despaixu mos ba ona bele halo pagamentu, sira ne’ebe mak parsela 20 ital ne’e sei aloka ba orsamentu 2020”, tenik Filipe

Iha atividades ne’e partisipa husi lider komunitaria husi aldeia hitu komunidade hamutuk 45 husi Aldeia Bemetan, Lalica, Loro, Leo-Ai, Rai-fusa, Selihasan, Sesurai.

LEAVE A REPLY

Please enter your comment!
Please enter your name here