Home Uncategorized Asumtu Ambiental Importante, Papel Jornalista nian Halo Advokasia no Muda Prespektiva Sosiade

Asumtu Ambiental Importante, Papel Jornalista nian Halo Advokasia no Muda Prespektiva Sosiade

69
0
Prezidente KI, SEA, UNDP iha seminariu konaba jurnalismu: Salva Ambiente. [Foto: Santina Lucia da Costa | 08.10.2019]

Reportazen Santina Lucia da Costa

Editor: Zevonia Vieira 

Environmentu nudar issue importante ihaera globalizasaun, ema hotu preokupa ho mudansa klimatika ne’ebe mak fo risku ba moris ema no animal sira.

Liu hosi treinamentu konaba media ho enviromentu, ne’ebe realiza hosi Konselho Imprensa Timor-Leste, servisu hamutuk ho Sekretariu Estadu Ambiente [SEA].

Ba jornalista sira Sekretario Estadu Ambiente, Demétrio do Amaral de Carvalho hateten, treinamentu ida ne’e, atu hasae koñesimentu jornalista sira nian, kona-ba asuntus ambiental iha Timor, atu nune’e asuntu ambiental sai fatin ne’ebé naton ba media imprimi, eletrónika no media online, hodi bele ajuda halo sensibilizasaun, halo kobertura ba asuntus ambiental, ne’ebé ohin loron haree katak sai problema mundial, “ita hotu hatene Timor-Leste risku ba dezastre , nomós ba rikusoin biodiversidade aas teb-tebes, maibé ita la fó importansia hodi hatene katak riku soin biodiversidade ne’e, rikusoin ida ne’ebé la hotu se wainhira ita maneja didiak”.

Sekretariu Estadu mos hateten katak media nia papel importante, tanba ne’e mak treinamentu loron haat ne’e fó importansia ba papel jornalista sira no hatene kontiudu, hodi halo publisidade kona-ba asuntu ambiente ho di’ak, atu nune’e bele fó informasaun lolos ba sosiedade sira no muda sosiedade nia prespektiva.

“Hau espera terinamentu ne’e, jornalista hahu dedika-an, grupu jornalista ambiente, bele servisu hamutuk halo kobertura, maske jornalista sira servisu ketak-ketak, maibé tenki buka malu para halo grupu ida, tanba haree ba politika redasaun durante ne’e ladun fó importansia ba asuntu ambiente”, tenik Demetrio, iha Hotel Timor 08/10.

Sekretariu Estadu mos informa katak sei iha novidades ida ba premiu jornalista liga ho jurnalismu ambiental, sei servisu hamutuk ho Konselho Imprensa dezenvolve termu referensia ida, ne’ebe sai matadalan, hodi hahu halo avaliasaun, “ne’e laos fulan ida maibé tempu naruk, ita tenki haree ninia konsistensia servisu, hodi halo kobertura ba asuntu ambiente nian, kontiudu ne’e iha balansu ka lae, atu nune’e ajuda jornalista ne’ebé servisu ba area ida ne’e bele orgullu”.

Iha fatin hanesan Prezidente Konsellu Imprensa, Virgílio da Silva Guterres hateten, seminariu ne’e atu hasa’e abilidade jornalista sira nian, atu haluan area kobertura ba asuntu ambiental.

“Hau hanoin Issu ida ne’ebé global, laos de’it iha Timor, iha rai seluk mós uluk jornalista nia focus mak atividade politika no buat sira ne’ebé mak relasiona ho politika, mais depois tinan 70 tesik mai, bainhira ONU komesa tau meio ambiente hanesan isu global ida. Hau hanoin ida ne’e sei kontinua iha Timor, ita nunka haree iha jornal sira satan iha headline ne’ebé sira foti asuntu kona-ba meio ambiente ninian.” Katak Prezidente KI

Virgilio mos esplika, Timor tama iha lista nasaun 10 mak vulneravel boot tebes ba dezastre naturais, “ita presija tebes kontinua fó formasaun, seminariu atu nune’e jornalista sira bele iha konsiensia foka liu ba meiu ambiente nian. Politika redasaun nia tenke tau ambiente importansia, labele haluha katak impaktu husi ambiente ninian ne’e sei afeita ema barak ninian moris, mudansa klimatika, media sira tenke tau iha ajenda”.

Iha hanoin hanesan mai hosi Reprezentante Programa Nasaun Unida ba Dezenvolvimentu (PNUD), Munkhtuya Altangerel hateten, Timor-Leste presiza duni media sira atu habelar area kobertura iha area ambiente, maibe ho tarefa verifikasaun konfirmasaun no klasifikasaun.

Munkhtuya mos informa katak PNUD nia kooperasaun ho KI kontinua hodi hasa’e kapasidade no konesimentu jornalista nian, atu halo kobertura foka liu ba meio ambiente iha Timor-Leste”, hateten Munkhtuya Altangerel.

Objetivu husi seminariu ne’e atu hasa’e jornalista sira nia konesimentu kona-ba asuntu meiu ambiente, mudansa klimatika no politika sira relasiona ba kobertura, media produz notisia ida akuradu, balansu liu husi imprime, radiu difuzaun no online.

Aleinde ida ne’e Konsellu Imprensa ho Sekretaria Estadu Meiu Ambiente asina nota kooperasaun atu hametin servisu no kobertura ba asuntu ambiente iha Timor-Leste.

Formasaun refere realiza tanba hetan apoiu finanseiru hosi PNUD/GEF, formasuan ne’e sei halao durante loron haat ne’ebe hetan partisipasaun hosi jornalista imprimi, elektronika no online.

 

 

 

 

LEAVE A REPLY

Please enter your comment!
Please enter your name here