Home Meio Ambiente Bebonuk: Jestaun Lixu Seidauk Efetivu, Rendementu Negosiu Kuliner Menus

Bebonuk: Jestaun Lixu Seidauk Efetivu, Rendementu Negosiu Kuliner Menus

72
0
Lixu iha Aldeia Metin 1, Tais Ibun, Bebonuk (Foto: Nogueira Mendes)

Reportajen Nogueira “Haksolok” Mendes

Iha Aldeia Metin 1, Suku Bebonuk, Dili, Jestaun lixu seidauk efetivu. Lixu ho tipu oioin soe hamutuk iha fatin ida. Aat liu tan bainhira ema sira servisu raut lixu la mai tuir tempu. Iis hosi lixu halo negosiante sira preokupa tanba sira nia kulinaria tradisional ladun folin.

Negosiante Quirinhos da C. Soares triste tebes  ba lixu ne’ebé tau besik iha nia fatin negosiu nian. Tanba lixu ne’e kuandu parte saneamentu la mai raut lalais bele fó impaktu ba sira tanba dois no iis maka’as, bele mós halo konsumidor sira la mai sosa ami nia produtu. Querinhos expresa ba jornalista sira iha area tasi ibun, horiseik, 10/10/2019.

“Ami hakarak lixu fatin ne’ebé maka diak, no do’ok hosi fatin ami faan sasan atu  nune’e ema bele mai  konsumu ami nia hahan,” dehan negosiante Querinhos.

“Uluk ne’e sei di’ak uituan, maibé agora lixu nia iis ne’e maka halo ema mai mós difisil ,tanba ema hare lixu ne’e besik liu fatin ne’e, tanba ne’e ami hakarak hato’o ba governu hodi ajuda muda ses tiha lixu fatin ne’e,” Quirinhos aumenta.

Xefi Suku Bebonuk, Serafin Maxedo rekoñese katak  sira sempre halo limpeja  maibé komunidade kuntinua soe foer arbiru.

“Hanesan liu-liu ita haree ba area tasi ibun nian, negosiante kulinaria tradisional sira nia fatin kumunidade sira maioria soe hotu foer iha ne’ebá.  Entaun ne’e afeita tebes ba sira nia negosiu  tanba dala ruma ema la sosa sira nia produtu,” tenik Xefe Suku.

Nia mos haktuir, tuir lolos lixu fatin ne’e la fo impaktu ba sira, se karik komunidade sira soe lixu ne’e tuir oras soe foer nian.

“Ami halo sosializasaun regulamentu ora’s soe lixu nian maibé dala barak komunidade  la halo tuir regulamentu ne’ebé ami sosializa ba sira. Negosiante mos tenki kopera  hamutuk iha ne’eba ,maibe sira fokus liu ba sira nia negosiu no sira la hare katak ambiente iha sira nia sori-sorin fo impaktu ba sira,” Xefe Suku hatutan.

Iha fatin hanesan, mediku Dulce da Costa, hosi Postu Saude Bebonuk hato’o katak lixu iha fatin neba la’os fó impaktu de’it ba negosiante maibé sei afeta mós ba konsumidor sira nia  saude ne’ebé mai konsumu hahan iha ne’ebá.

“Foer ne’e iha nia impaktu bot teb-tebes ba ema nia saude, laos labarik kiik de’it, maibé inklui mós ema boot. Tanba lalar  no barata sira ne’ebé mai hobur foer sira pois ba tur fali iha hahan sira nia leten, no foer hirak bele kontamina fali hahan sira. Nune’e bainhira ema konsumu hahan, sira bele hetan moras hanesan diarea,” dehan Mediku Dulce.

Diretor Saneamentu, Jeca Smith, ba jornalisat sira nia esplika kona ba lixu rua ne’ebé tau iha komunidade negosiante kuliner sira nia oin iha area suku Bebonuk  aldeia metin 1 tasi ibun.

Jeca haktuir, lixu fatin ne’ebá la’os negosiante sira de’it mak soe foer  iha ne’ebá  maibé komunidade sira mós soe hotu.  entaun ita susar atu kontrola, no  ema seluk sempre  atu baraila, buka atu estraga. Tanba ne’e  fatin balu sempre sai vitima.

“Kunmunidade balu kalan boot mak tula foer ho kareta pois ba fakar hotu iha fatin refere, halo negosiante sira iha fatin ne’ebá sai vitima. Maibé tempu badak ami sei muda ses tiha lixu fatin rua ne’e,” Dehan  Diretor Saneamentu, Jeca.

Tuir dadus ne’ebé ekipa kobertura hetan  iha sentru  saude katak moras diarea nia porsentu sae makas iha fulan setembro hamutuk 779  kondisaun ne’e akontese tamba impaktu hosi ambiente ladun mos.

LEAVE A REPLY

Please enter your comment!
Please enter your name here