Home Feature Nu’udar Agrikultor no Karau Atan, Marcelino Konsege Lori Oan Sira To’o Iha...

Nu’udar Agrikultor no Karau Atan, Marcelino Konsege Lori Oan Sira To’o Iha Universidade

557
0
Marcelino Pereira Boavida karau atan ne'ebe konsege lori oan sira to'o iha universidade. [Foto: Adalgisa Pereira | 31.01.2020]

Kontributor Adalgisa Pereira

Oan mak fitun, oan mak sei sai futuru ba nasaun murak ida ne’e, atu halo nasaun ne’e sai diak liutan, edukasaun mak dalan ba ema hotu atu hakat.

Marcelino Pereira Boavida, idade 50 ne’ebe loron-loron halao nia kna’ar nu’udar agrikultor, iha aldeia Lalulai, suku Samalari, municipio Baucau, Marcelino nudar aman ida, fo an tomak iha vida agrikultor, ho mehi ida atu bele sustenta nia oan sira hodi asesu edukasaun.

Tan de’it hakarak atinji oan sira nia mehi no suporta oan sira atu asesesu iha edukasaun ne’ebe a’as, hanesan ema seluk, mane ne’ebe ho idade avansadu ne’e servisu maka’as no la sente kolen.

Maske loron tiru maka’as ba kulit, kosar wen turu hosi ulun tun mai, maibe Marcelino sempre ho haksolok kontinua halao nian knaar. Iha tempu udan, udan been suli kona nia isin lolon, maibe ida ne’e la hamate espritu Marcelino nian, hodi halo to’os.

Jornalista koko hein Marcelino fila hosi toos, no hatama nia karau ba luhan, no bainhira rai komesa nakaras, Marcelino hp nia katana ne’ebe uza hodi lere to’os no pasta koor metan, ne’ebe nia tara hakbesik ba jornalista, hodi komesa tesi lia.

“Ha’u lakohi ha’u nia oan hanesan ha’u, la asesu iha nivel edukasaun ne’ebe mak  a’as, maibé ha’u sei forsa hodi kontribui nafatin ba sira, hodi asesu iha nivel edukasaun ne’ebe mak imi hakarak, la’os ba mane de’it, maibé ba oan feto ho mane se mak iha espiritu atu kontinua nia estudu ba nivel a’as, ha’u prontu kontribui ba sira, banhira ha’u sei forsa”, tenik Marcelino ba jornalista ho nafatin iha espiritu.

Marcelino nia fuan sorin Martinha Gusmao Pereira, idade 47, moris hanesan mos agrikultura. Marcelino ho Martinha sempre truka malu hodi, hela iha Baraka ne’ebe sira halo besik natar, hodi hein karau no hare sira ne’ebe kuda.

Sira iha oan nain hitu, mane haat, feto tolu, maske Baraka ne’e ho kondisaun la dun diak, maibe iha baraka ne’e, aifuan domin husi Martinha ho Marceleino nian , konsege asesesu hotu ba edukasaun, maske aman ho inan moris hanesan agrikultura ho karau atan [hein karau. red].

Bainhira diskusaun lao, hodi hatene istoria ne’ebe mak Marcelino ho Martinha halo ona ba oan sira, sente hanesan inspirasaun boot ida, katak atu asesu edukasaun iha nivel aas, laos ho osan boot, laos ema riku nia oan, maibe bainhira aman no inan iha domin boot, ho osan sentavos deit, oan sira bele hakat to’o iha fitun ne’ebe aas, hodi asesu edukasaun ho kualidade.

Furak liu bainhira jornalista halo observasaun direita hosi diskusaun ne’ebe lao, hatudu katak Marcelino la halo diskriminasaun ba oan feto no mane, maske la aprende saida mak jeneru, maibe iha realidade Marcelino pratika duni, oinsa fo prioridade hanesan ba oan feto no mane, hodi asesu edukasaun.

Marcelino orgulhu tanba konsege halo nia oan mane Evangelino Manuel Pereira konsege remata nia estudu iha Universidade da Paz, fakuldade Teknik, Departementu Arkitektura iha tinan 2018 no hanesan pintora iha Arte Moris

“Hau orgullu tamba hau nia oan mane bo’ot bele atinji ona nia estudo iha universidade nu’udar lisensiadu iha departamentu arkitektura iha tinan 2018, no hanesan mos pelukis/pintora iha Arte Moris. no nia feton  ida mos dadaun ne’e  estuda hela iha Universidade no oan sira seluk ne’e mos eskola hela iha sekundariu”, tenik Marcelino

Martinha Gusmao Pereira, inan hosi oan hitu ne’e, maske nunka asesu edukasaun iha nia moris, maibe nia konsege hatudu domin boot ba oan sira, atu labele lakon futuru, tanba ba sira edukasaun ne’e mak dalan ida, atu ses hosi mukit.

Ho hamnasa midar no sente kontente, tanba domin ne’ebe nia fo ba oan sira, ohin loron oan sira hatudu ona, liu hosi susesu ne’ebe sira atinji.

“Ha’u sente kontente maske uluk ha’u la eskola, maibé ha’u nia oan bele remata nia estudu iha Universidade, hau nia oan feto mós bele eskola iha Universidade hanesan ho nia maun ,tamba ami iha familia ne’e la fo oportunidade deit ba mane maibé fo liberdade se mak hakarak eskola,” tenik Martinha ho kontente no hatudu duni nia domin ba oan nain hitu.

Edukasaun mak dalan uniku atu ita ses hosi mukit, edukasaun mak sai baze fundamental ba ema hotu, hodi lori nasaun ne’e dezenvolve di’ak liutan. Atu dezenvolve nasaun, la hare ba mane, feto, kiak ka riku, maibe ema hotu iha oportunidade hanesan. Ida ne’e mak Marcelino no Martinha halo ona, ba mudansa ne’ebe diak liu ba nia oan sira.

*[Adalgisa P, hakerek nain nudar estudante UNTL, ne’ebe tuir jurnalismu klinika, kooperasaun entre UNTL – UNESCO. Rezultadu hosi kursu ne’e, mentor publika nia artigu iha Neon Metin]

LEAVE A REPLY

Please enter your comment!
Please enter your name here