Home Meio Ambiente Akontese Inundasaun Iha Aldeia Gideon, Felismina: Udan Been Tama Estraga Fo’os, Kulsaun...

Akontese Inundasaun Iha Aldeia Gideon, Felismina: Udan Been Tama Estraga Fo’os, Kulsaun no Sasan Dapur nian.

358
0
Aldeia Gideo iha Suku Vila Verde ne'ebe sempre akontese inundasaun iha tempu udan. [Foto: Constancio Assuncao | 31.01.2020]

Kontributor Constan Assuncao 

Tempu udan sai atensaun no preoukupasaun boot iha komunidade nia leet, liu-liu capital Dili, laos tanba udan ne’e rasik, maibe tanba akontese inundasaun no soe lixu arbiru, halo ema hotu preokupa ba risku neebe sei mosu.

Ida ne’e akontese iha aldeia Gideon, suku Vila Verde, iha Ministerio Solidaridade Social e Inkluzaun [MSSI], nian kotuk, sempre akontese inundusaun, tanba be’e dalan laiha, atu be’e halai tuir nia dalan.

Komunidade ne’ebe mak hela iha Gideon, Felismina Ello ba jornalista Komunikasaun Sosial UNTL hateten bainhira udan tuun, komunidade sira sai ladiak no mos estraga sasan iha uma laran, tanba udan been tama to’o iha uma laran.

 “Bainhira udan mai ami sempre atrapalha ba ami nia sasan hanesan  foos no kulsaun,  se lae udan tama mai, estraga hotu sasan no halo rai dodok tanba be’e nalihun deit”, tenik Felismina ba jornalista UNTL, bainhira hasoru nia iha hela fatin, 27/01.

Felismina hatutan inundasaun ne’ebe  mosu iha sira nia area, tanba  kauza husi bee dalan [saluran air. Red], mak laiha hodi be’e nalihun to’o hamosu susuk barak iha fatin refere

“Kuandu udan boot mai, be’e sempre nalihun deit iha ami nia uma oin, tanba irrigasaun laiha, hodi bee la halai tuir iha nia fatin to susuk mos tolun hotu iha be’e laran”, konfesa Felismina.

Ho situasuan ne’ebe Felismina ho komunidade sira seluk hasoru, nia ezije ba governu, liu-liu ba ministeriu relevante, atu bele tau atensaun no hadia be’e dalan, hodi nune’e bainhira udan komunidade sira la sente preokupa tan.

Iha fatin hanesan Komunidade ne’ebe mak hela mos iha Gideon, Alventino Sejari Soares ba jornalista hateten inundasaun kuandu akontese, lixu sira ne’ebe soe iha baleta kuak, hamosu intipidu.

 “Iha ami nia area ne’e be’e dalan ki’ik la iha,  so iha be’e dalan bo’ot bainhira lixu sira ne’e hamutuk iha baleta, kuandu intupidu entaun be’e sae fali mai ami nia uma laran”, hateten Alventino.

Alventino uza alrtenativa seluk, hodi hamenus risku tanba soe lixu arbiru no inundasaun, nia koko tau lixu hamutuk iha karon, atu nune’e bele minimiza problema ne’ebe akontese bebeik.

Jornalista koko dadalia ho Xefe Aldeia Augostu Vieira Araujo da Costa esplika katak, aldeia Gideon sempre akontese inundasaun kada tinan, no sempre afeta ba komunidade sira ne’ebe hela iha fatin refere.

“Autoridade lokal  sempre iha planu atu koopera ho kmunidade ne’ebe afetadu, atu halo be’e dalan rasik, maibe komunidade balun sempre kontra, tanba fatin ne’e atu gusur [eviksaun. Red], tanba rai refere iha ona sinal mean, no agora autoridade local defisil atu resolve, tanba orsamentu laiha , atu jere iha aldeia ne’e ”, hateten Augostu.

*[Constancio Assuncao, hakerek nain nudar estudante UNTL, ne’ebe tuir jurnalismu klinika, kooperasaun entre UNTL – UNESCO. Rezultadu hosi kursu ne’e, mentor publika nia artigu iha Neon Metin]

LEAVE A REPLY

Please enter your comment!
Please enter your name here