Home Notisia Lansa Matadalan Reportajen Covid-19, KI: Jornalista nian Papel Informativu no Edukativu

Lansa Matadalan Reportajen Covid-19, KI: Jornalista nian Papel Informativu no Edukativu

632
0
KI, UNDP, AJTL no TLPU lansa matadalan reportajen ba Covid-19. [Foto: Santina Lucia da Costa | 11.05.2020]

Reportazen Santina Lucia da Costa

Serbisu jornalista nian iha situasaun surtu moras Covid-19 importante tebes, hodi informa nutisia ne’ebe mak los no edukativu.

Iha loron Konsellu Imprensa (KI) ba dahaat nian, liu hosi konferensia imprensa, Prezidente KI, Virgilio Guterres husu ba jornalista sira no komunikasaun social hotu ne’ebe eziste, hodi kumpru Matadalan Kobertura ba Covid-19, bainhira halo kobertura ba asuntu pandemia virus Corona ne’ebe dadauk ne’e sai ameasa ba vida uma iha mundu.

Matadalan ne’e nudar regra moral no konduta hahalok nian ba jornalista no meiu komunikasaun sira lao tuir bainhira hala’o atividade jornalistiku no halo publikasaun notisia konaba asuntu Covid-19.

“Matadalan reportajen ba Covid-19 foti valor no prinsipiu sira ne’ebe kodigu etika jornalistiku opta, por ezemplu, notisia tenke cover both sides no jornalista tenke halo verifikasaun ba informasaun hotu-hotu no nia fonte sira antes publika”,  hateten Prezidente Konsellu Imprensa, Virgílio da Silva Guterres iha salaun KI, 11/05.

Prezidente KI mos husu ba jornalista no meiu komunikasaun hotu-hotu atu hala’o nia papel informativu no edukativu ho lolos, hodi labele produz no publika notisia sira ne’ebe nia konteudu sensasional no hamosu paniku iha sosiedade nia leet.

“Jornalista ho mídia iha atu ajuda reduz paniku, laos atu aumenta situasaun sai paniku liu tan. Kuandu mídia mos hamosu notisia ne’ebe sensasional no espekulativu, ida ne’e sei halo povu la hakmatek. Ezemplu iha notisia ne’e dehan posibilidade ema ne’ebe infetadu pozitivu virus Corona sei aumenta ka metade husi populasaun sei infetadu. Ida ne’e mak notisia ne’ebe nia konteudu ne’e sensasional no espekulativu”, Virgilio esplika.

Iha okaziaun ne’e hodi KI nia naran Virgilio agradese ajensia Nasoens Unidas liu hosi UNDP no governu Koreano ne’ebe kontinua fo sira nia apoiu hodi fasilita produsaun Matadalan Reportajen Covid-19.

CI mos agradese AJTL no TLPU ne’ebe sai ona parseiru di’ak durante ne’e, hodi luta no defende nafatin liberdade imprensa no liberdade espresaun iha Timor-Leste, liuliu kontextu propagasaun iha Covid-19.

Durante ne;e KI halo ona kooperasaun no parseria ho organizasaun no ajensia sira iha rai laran no rai liur hanesan SECOMS, meiu komunikasaun social hotu, SEAPA, IFJ, UNESCO, AJI, Dewan Pers Indonesia, LBH Pers Indonesia, PNTL no Instituisaun sira seluktan.

Print Friendly, PDF & Email

LEAVE A REPLY

Please enter your comment!
Please enter your name here