Home Notisia Kazu Lahane, PM: Sai Polisia no Forsas Armada Tenke Kontrola Emosaun

Kazu Lahane, PM: Sai Polisia no Forsas Armada Tenke Kontrola Emosaun

90
0
PM Taur Matan Ruak. [Foto: Santina Lucia da Costa | 10.06.2021]

Reportajen Santina Lucia da Costa

Akontesimentu iha Lahane, bainhira membru polisia nain ida tiru mate sidadaun nain rua mate no nain ida kanek, iha madrugada loron 5 Juñu, ba jornalista sira Primeiru Ministru, Taur Matan Ruak deklara katak kondena aktu ne’e no triste liu tanba sira mesak familia

Kondena aktu ne’e no nia triste tanba ida komete aktu ne’e no sira ne’ebe vitima ne’e mesak familia.

“Ita kondena aktus sira hanesan ne’e, alende ida ne’e hau triste liu, manifestasaun ne’e tristeza ba akontesimentu ida ne’e, tanba tantu ida ne’ebé komete aktus ida ne’e, como sira vítima, sira ne’e familia, ida ne’e mak hau triste liu,” hateten Primeiru Ministru, Taur Matan Ruak iha Palasiu Prezidensial, Nicolau Lobato, Bairu-Pite, loron, 10/6.

Primeiru Ministru hatutan prosesu ne’e lao hela, suspeitu iha hela prizaun preventiva agora,  iha kazu ne’ebé akontese ne’e, laiha kazu ne’ebe justifika, para ita uza violensia, sa tan hanesan kazu partikulár Lahane nian, mesak uma lisan ida no família ida

“Hau hakarak apela ba povu tomak katak, ema ida mak sala ne’e, ita labele dehan ema hotu mak sala, familia Antonio nian, se Joao mak sala, entaun Joao mak sala, la’os familia tomak sala hotu. PNTL mós hanesan, tanba ne’e mantein respeita,  mantein kooperasaun di’ak ho instituisaun ita nian, tanba ne’e instituisaun hanesan ita nia liman karik, liman los mak forsas armadas, liman karuk mak PNTL. hau apela, konserteza  aktus hotu-hotu ne’ebé violensia ne’e ita hakribi.” deklara, PM Taur.

Taur Matan Ruak akresenta daudaun ne’e diskute hela estatutu PNTL nian, maibé problema ne’e iha kontrolu, kontrolu kona-ba oinsá lori kilat, kontrolu emosaun, tanba ita kuandu kaer kilat ne’e, ne’e ita tenki kuidadu, ita kaer kilat, tudik, ita tenki konfia uluk ita nia-an, buat sira ne’e halo di’ak mais aat ba ita. Normalmente ema nebe sai polisia, sai forsas armadas ne’e kontrolu-an, kontrolu emosaun, labele ki’ik boot hanesan cowboy, ita presiza treina di’ak.

Konaba ezonerasaun ba Komandante Jeral PNTL, Komisariu Faustino da Costa, Taur dehan sedauk to’o iha ne’e, naturalmente hanesan Ministériu Interior (MI) no prósima hanesan eis-Jeneral ida, ne’e akompaña.

 “Hau seidauk to’o iha nee, naturalmente hanesan MI no prósima hanesan eis Jeneral akompaña. Hau agradese ba opinoens hotu-hotu, tantu sosiedade sivíl, organizasoen  defeza direitus humanus sira aprezenta,” tenik Taur Matan Ruak.

Iha fatin hanesan Komandante Jeral PNTL Komisariu, Faustino da Costa hateten, kona-ba estatutu  PNTL aprezenta ona ba governu, hein katak sei hetan rezultadu di’ak. 

“Ida ne’e la’os ami foin atu kolia, ami sempre ko’alia beibeik, PNTL ne’e 21 anos, estatutu ne’e agora mak ita aprezenta hela ba iha governu, maibe ita tenta hela halo reforma ba lejizlasaun balun. Tanba ne’e maka iha proposta ida husi komando sei prepara, laos de’it estatutu pesoal polisia, maibe propria organika regulamentu disiplinar, no rejime sira ne’ebé maka iha ligasaun, sira ne’e ami aprezenta ona ba governu, fiar katak sei hetan rezultadu ida diak,” hateten Komandante Jeral PNTL, Komisariu, Faustino da Costa.

Print Friendly, PDF & Email

LEAVE A REPLY

Please enter your comment!
Please enter your name here