Home Analisa Utilidade Publika La Aplika Ba Uzu Privadu

Utilidade Publika La Aplika Ba Uzu Privadu

270
0
Ekipa Rede ba Rai halo diskusaun ho rai nain. [Foto: Dok. Rede ba Rai | 02.04.2022]

Hakerek nain Jemicarte Moniz dos Reis

Estadu no nia orgaun mak kaer poder bo’ot liu iha nasaun tomak atu jere no regula rai no komunidade sira iha Timor-Leste. Maske nu’une la signifika katak estadu bele foti rai arbiru deit no sem kuiñesimentu. Dalabarak mosu haksesu entre komunidade ne’ebé kleur ona hela iha rai refere mesmu sira hatene katak rai ne’e dominio privadu estadu, estadu foti rai tanba ho razaun oi-oin hanesan:

  1. Estadu foti tanba rekoñese Sistema okupasaun iha pasadu;
  2. Estadu foti rai ba dezenvolvimentu nasional;
  3. Estadu foti rai ba konservasaun;
  4. Estadu mós foti rai komunidade nian hodi fó ba kompaña.

Problema estadu foti rai agora dadaun sai hanesan polemika bo’ot ba komunidade iha nasaun Timor-Leste. Estadu foti rai mak problema ne’ebé serious liu iha Timor tomak. Bainhira kolia kona ba istoria rai kuaze suku ida-idak iha nia istoria rasik no nia kontextu ne’ebé diferente. Maske nu’une esperensia ida ne’ebé ita bele dehan mak hanesan iha suku hotu-hotu mak esperensia kolonialismu Portuguesa no okupasaun tempu Indonesia. Komunidade Timor tomak senti impaktu husi kolonialismu Portuguesa no okupasaun Indonesia. Ukun husi nasaun rua ne’e impaktu bo’ot laos deit ba ema nia moris no liverdade maibe mós impaktu bo’ot ba komunidade nia direitu ba rai.

Iha parte balun estadu mós foti dominio privadu estadu no entrega fali ba instituisaun privada sira. Komunidade sira mós kestiona asaun ida ne’e husi governu tanba dalabarak la fó benefisiu ba sira nu’udar povu Timoroan no rai nain. Iha sorin seluk dalabarak instituisaun privada  aproach kedas governu no komunidade rasik la rona kona-ba kontratu ka konkordansia to’o instituisaun privada mai atu halo lansamentu projetu ka atu sukat sira nia rai ka hela fatin.

Kazu hanesan ne’e akontese iha Munisipiu Covalima, Ermera, Lautem Ainaro Manufahi inkliu Munisipiu Dili bairo seroja aldeia Golgota  governu ne’ebé atu oferese komunidade seroja nia hela fatin ba instituisaun privadu. Signifika Estadu la fo previléizu ba nia povu, maibé fó previléiju ba instituisaun privadu hanesan São Miguel Arcanjo hodi aranja fatin ba instituisaun refere hodi halo edifisiu.

Tuir Diretór Jerál Terras Propriedade, Sr. Rodrigo Mendonça esplika, loos duni eskola São Miguel Arcanjo ne’e institusaun privadu, governu la preokupa ho eskola privadu ka publiku maibé preokupa deit ba estudante rihun resin ne’e ninia futuru ba oin. Bainhira preokupa interese estadu, tenke preokupa mós ba estudante sira nia futuru tanba laos eskola publiku deit mak prepara ema ba futuru. Governu prepara fatin ba eskola São Miguel Arcanjo ho razaun katak, eskola ne’e harii iha inisiu hetan koñesimentu husi governu, no mos akumula estudante sira husi suku madohi, komoro no mos Tibar entaun governu labele muda eskola ne’e dook husi estudante sira hodi prezudika sira nia atividade. nia realsa, iha konstituisaun RDTL, artigu 54° alinea 2 ne’e koalia klaramente katak, rai privadi mos governu kuandu presiza, rai nain tenke husik fatin ne’e entrega ba governu ba interese estadu nia atu halo dezenvolvimentu.[1] Tuir hakerek nain hakarak hateten katak Diretór Jerál Terras Propriedade, Sr. Rodrigo Mendonça seidauk intende didiak Lei Nú 8/2017 kona Espropriasaun Tanba Utilidade Públiku, tanba iha Lei ida ne’e kolia klaru katak utilidade públiku labele fó ba instituisaun privada, Utilidade publiku bele aplika deit ba edukasaun ka ensinu públiku.

Triste tebes katak iha tinan rua nulu resin ona ukun rasik an nia laran ne’e Dirasaun Nacional Terras Propriedades e Serbisus Cadástrais DNTPSC la kónsege leno an hanesan Instituisaun Estadu nian ne’ebé tau matan ba administrasaun rai ba komunidade iha Timor Leste. Tempu to’o ona presiza estadu hari’i sistema administrasaun rai ne’ebé modernu hodi hametin direitu nai’n ba rai iha komunidade. Nu’une bele evita ema kapitalista, politiku no Estadu mak domina rai iha Timor Leste. Estadu labele sai nai’n ba rai maibe Estadu bele administra deit koná ba oinsa sidadaun ida bele asesu ba uza rai. DNTPSC núdar institúisaun Estadu nian iha knár regúladora asúntu asesu ba rai nian. Tan ne’e DNTPSC presiza familiariza prosesu administrasaun rai iha komunidade atu garante direitu asesu ba rai hodi prevene konflitu kona ba rai iha komunidade.

Bele halo espropriasaun ba beim-imóvel sira ho objektivu ho fin uza ba utilidade públika bazeia ba Lei Nú 8/2017 tuir artigo 2 al (g) espropriasaun tanba utilidade públiku define katak prosesu ida ne’ebé atu prosege fin interese públiku nian, Administrasaun restrinji direitu ema interesadu sira nian kona-ba bem-imovel, transfere fali bem ne’e ba patrimoniu estadu nian, liu husi pagamentu justa indeminizasaun.

Konforme Nú 1 husi Artigu 4 lei hateten katak admiti halo espropriasaun ba kazu sira ne’ebé bem atu apropria tenke hetan nia finalidade utilidade públika. Konsidera katak utilidade públika ne’e mak define iha númeru 3 al (a-t) lei espropriasaun. Ne’e signifika katak ba atividade hirak konsidera privadu hanesan eskola privadu, hospital privadu, empreza privadu sira. Sira labele halo espropriasaun ka hasai komunidade sira iha nia hela fatin ka propriedade beim-imóvel.

Rekomendasaun :

  1. Presiza Governu halo sosializasaun ba Lei Númeru 8/2017 ba komunidade atu nu’une komunidade sira bele komprende konteudu husi lei ne’e rasik.
  2. Presiza Kolaborasaun husi Ministeriu Justisa, Diresaun Nasional Terras e Propriedade.

[1] Asesu informasaun husi https://lafaeknews.com.

Print Friendly, PDF & Email

LEAVE A REPLY

Please enter your comment!
Please enter your name here