Home Meio Ambiente Tasi Ibun Bidau Lakon nia Furak, Tanba Lixu Plastiku

Tasi Ibun Bidau Lakon nia Furak, Tanba Lixu Plastiku

225
0
Lixu plastiku no kaleng ne'ebe komunidade soe iha mota bidau, mota lori to'o tasi ibun Bidau. [Foto: Bernarda da Costa | 31.01.2020]

Kontributor  Bernarda da Costa & Grabiela Pereira Maya

Wainhira iha tempu udan, mota sempre lori foer sira nakonu iha tasi ibun, hodi estraga animal sira ne’ebe moris iha tasi laran no halakon paizajen furak tasi nian.

Lixu ne’ebe agora dadauk sai problema boot iha ita nia laos deit iha Timor, maibe iha mundu tomak, ema hotu preokupa, ba risku boot hosi lixu, ne’ebe sei estraga ambiente.

Situasaun ne’e halo jornalista sira foti atensaun, hodi hakbesik ba komunidade sira ne’ebe hela besik tasi ibun. Komunidade Juliana de Sousa da Costa, hela besik tasi ibun Bidau Santana, ba jornalista Komunikasaun Sosial UNTL, katak iha tempu udan, lixu sempre mosu barak iha dalan ninin, mota laran no baleta sira, ida ne’e impkatu hosi ema sira ne’ebe soe lixu arbiru

 “Dala ruma ema sira ne’ebe mak hela iha mota ninin, sira la lori foer, hodi soe iha fatin lixu ne’ebe mak governu prepara ona, maibe sira hare deit wainhira iha tempu udan ,mota komesa tun ona entaun sira foti deit  foer hodi fakar tun mai iha mota laran, atu nune’e mota bele lori tun mai para hamutuk iha tasi ibun”, konfesa  Juliana iha Bidau Santa Ana, kuarta 29/01.

Juliana hatutan katak hahalok hosi soe lixu arbiru, tanba komunidade sedauk iha konsiensia, hodi soe lixu iha nia fatin, Juliana preokupa bainhira los mak nasaun ne’e bele sai moos.

Iha parte seluk Pesoal Apoiu Administrasaun Suku Bidau Santa Ana Fransisco Reis Ximenes Soares hateten relasiona ho foer sira ne’ebe mak nakonu iha tasi ibun, komunidade hatene katak agora tempu udan, no lixu namkari iha tasi ibun, tanba impaktu hosi ema ne’ebe lakohi soe foer iha lixu fatin.

“Komunidade sira sempre soe foer iha dalan publiku sira ,baleta no mota laran, ida ne’e ita bele dehan komunidade sira laiha konsiensia no wainhira iha tempu udan, agora dadaun entaun mota tun sempre lori foer sira ne’e mai hotu para iha tasi ibun no bele estraga mos animal hirak ne’ebe mak iha tasi laran”, esplika Francisco ba jornalista UNTL

Francisco mos hateten iha Suku Bidau Santa Ana iha ona planu, hodi serbisu hamutuk ho pesoal limpeza sira, hosi Municipiu Dili, ne’ebe aloka iha Posto Administrativo Kristo Rei, hodi halo limpeza husi tasi ibun Bidau Santa Ana nian no ba to’o iha Postu Kristo Rei, limpeza ne’e  laos hala’o deit iha loron sexta, maibe sempre hala’o kada loron.

Maske esforsu no implementa ona planu, hodi koopera ho komunidade sira halo limpeza, maibe tuir observasaun direita hosi jornalista, sei hatudu katak lixu botir plastiku, kaleng, lixu plastiku sira seluk, sei namkari iha dalan no tasi ninin. Komunidade sira sedauk fo atensaun seriu ba iha problema lixu.

Karik ho deit limpeza bele resolve problema lixu? Karik ho deit bandu uza butir plastiku ka plastiku sira seluk bele redus lixu sira iha Dili laran?

Hosi obserasaun hirak ne’e ba jornalista Francisco sujere ba komunidade sira, atu iha konsiensia hodi labele soe lixu arbiru iha mota laran ka baleta, rai lixu iha fatin lixu, hodi nune’e bainhira kareta raut foer, hafasil sira nian serbisu no bele garante sidade Dili ses hosi foer ka lixu.

Bainhira ita hakarak salva ita nia an, la moris iha risku nia laran, ita rasik mak hahu salva no hadomi ambiente. Bainhira ita nia an hahu salva ambiente no proteje animal sira iha tasi laran, tanba sira la consume lixu ne’ebe ita soe, ita nia riku soin iha tasi laran, sei la lakon, bainhira ita muda salva sira, ita salva ona mundu ne’e.

*[ Bernarda da Costa & Grabiela Pereira Maya hakerek nain nudar estudante UNTL, ne’ebe tuir jurnalismu klinika, kooperasaun entre UNTL – UNESCO. Rezultadu hosi kursu ne’e, mentor publika nia artigu iha Neon Metin]

LEAVE A REPLY

Please enter your comment!
Please enter your name here