Reportazen Francisco JDA
Centru Integradu Jestaun Krize [CIJK] kontinua publika informasaun relasiona ho moras Covid-19 ba loron 24 Abril nian.
Liu hosi konferensia imprensa, Portavoz CIJK, Dr. Sergio Lobo informa katak rezultadu teste laboratoriu hamutuk 392, kazu konfirmadu total ema nain 24, rekupera nain 2, negativu sae ba 347 kazu foun 1. Ba kazu provavel nain 4 halo ona teste nia rezultadu ikus negative hotu no sei muda sira hosi izolamentu ba fali kuarentena no ema nain 21 mak sei hein rezultadu.
Dr. Sergio hatutan katak maluk sira ne’ebe postivu virus Corona restritu ba klaster 6 katak mai hosi hotel Katuas, Timing, Licedere, Fortuna, Horizonte no kazu Liquisa nian.
Konaba klaster professor Portugueses nian iha Liquisa, Dr. Sergio Lobo esplika katak ekipa vijilansia epidimiolojika halo tiha ona investigasaun ba ema sira hela iha area Liquisa nian katak sedauk hetan evidensia konaba transmisaun local no laboratoriu nasional mos halo ona teste ba ema nain 17 ne’ebe iha sintomas mear no inus been, halo ona amostra no sei hein rezultadu hosi Darwin.
