Reportazen David da Costa Gusmao
Ministra Saude (MS) liu husi Koordenador Pilar VII Covid-19 Dr. Nilton do Carmo da Silva husu ba komunidade sira iha fronteira atu hakmatek iha ida-idak nia fatin, tanba solusaun ne’ebe diak mak sidadaun sira labele kontinua tama sai ilegal iha fronteira.
“Atu dehan de’it katak solusaun di’ak liu ba ita-nia komunidade no ita-nia nasaun Timor-Leste maka sidadaun hotu-hotu tenki hakmatek iha fatin, labele hakat fronteira tama sai ho ilegal”, dehan Dr. Nilton do Carmo da Silva iha Palacio da Cinzas Kaikoli, 14/02.
Nia haktuir tamba atetudi sidadun sira ne’ebe tama sai, sei lori perigu boot ba populasaun tomak iha Timor-Leste.
“Iha inísiu kedas COVID-19 ne’e mosu iha ita nia rai to’o agora, ho ita nia serbísu maka’as ohin loron ita laiha transmisaun iha komunidade”, nia sublina.
Nia konklui katak ho hahalok ema ida-rua ne’ebé laiha responsabilidade, transmisaun komunidade bele mosu iha tempu saida deit.
