Reportazen Francisco JDA
Asosiasaun Jornalista Timor Leste (AJTL) no United Nation Development Program (UNDP) asina Nota de Entedimemtu, ba projetu desentralizaun, hodi haforsa ka fortaleze resposta nasional no municipiu ba moras COVID-19, hodi kontra no kombate nutisia falsa no desinformasaun konaba COVID-19
Presidente AJTL Zevonia Vieira ba Jornalista sira hateten AJTL ho UNDP sei serbisu ba iha haforsa resposta nasional no municipiu nian, hodi halo programa edukasaun sivika liu hosi radio komunidade sira, hodi fahe informasaun sira konaba prevensaun COVID-19 no kontra nutisia falsu sira ne’ebe akontese iha komunidade nia leet.
Prezidente AJTL hateten iha projetu ne’e sei serbisu hamutuk ho radio komunidade neen mak hanesan radio komunidade Viqueque, Radio Tokedede Liquisa, Radio Atoni Lifau Oecusse, Radio Atauro, Radio Covataroman Suai no Radio Komunidade Maliana, desidi tuir risku ne’ebe mak bele afeta COVID-19 no mos tanba area rural ne’ebe la asesu informasaun.
“Liquisa foin lalais akontese kazu positivu, iha Viqueqeu tanba nia frekuensia boot no bele ajuda area rural sira seluk hodi asesu informasaun hirak ne’e, municipiu 2 no RAEOA ne’ebe besik liu fronteira no Atauro mos nudar fatin ida ne’ebe sempre akontese ema tama illegal ho nune’e AJTL ho UNDP desidi hamutuk hili radio 6 ne’e”, hatetn Zevonia iha salaun enkontru UN iha Kaikoli, 01/09.
Zevonia hateten target ba benefisiariu sira ne’e mak ba grupu feto vulneravel, marginal sira hanesan maluk ho difisiensia, LGBTI, labarik sira, profesores no infermeira lokal sira ne’ebe halao serbisu iha area rural.
Programa ne’e sei hahu hosi Septembru to’o Dezembru 2020 no iha tempu badak sei realiza formasaun konaba Jurnalismu siviku ba radio komunidade neen antes radio komunidade hirak ne’e hahu produsaun iha sira nia kontestu lokal.
Iha fatin hanesan, Project Manager Desentralisation UNDP, Bernadinho Pereira ba jornalista sira esplika katak, AJTL hanesan parseiro servisu ida durante ne’e, la’ós foin asina akordo maibé UNDP fiar katak bele servisu hamutuk, liu-liu dezenvolve area Jurnalismu nian, AJTL hanesan instituisaun ida ne’ebé mak UNDP bele dehan kualidade instituisaun, ne’ebé mak bele servisu hamutuk ho UNDP.
“Objetivu Prinsipal mak atu hare liu oinsá kualidade informasaun hanesan iha area rural Municipiu ne’ebé sai UNDP nia alvu, hare liu ba informasaun sira ne’ebé bolu miss Understanding, imformasaun ne’ebé dalaruma rumores de’it, la bazeia ba faktus liu liu komunidade vulneravel sira no sai hanesan prekupasaun”, hateten Project Manager Desentralisation UNDP Bernadinho Pereira ba jornalista sira.
Orsamentu ba projetu ne’e UNDP apoiu ho total orsamentu $10 mill ba AJTL hodi implement programa refere.
