Home Feature Covid-19, Madalena Moris Hosi Hili Besi, Fos Lata 1 Hosi Vijinho Aguenta...

Covid-19, Madalena Moris Hosi Hili Besi, Fos Lata 1 Hosi Vijinho Aguenta Moris Loron sorin nian

1084
0
Madalena Jose moris hosi Lixu. [Foto: Santina Lucia da Costa | 29.04.2020]

Reportazen Santina Lucia da Costa

Moris susar iha situasaun Covid-19, kontinua akontese ba maluk kbiit laek sira, laos hetan moras Corona maibe susar oinsa hatutan moris hodi bele han loron ida dala tolu.

Situasaun susar ida mai hosi Madalena Jose, idadde 49 moris hosi hili besi, lata, almunium, fiu no seluk-seluktan, hodi bele faan fali, atu bele sosa netik ai-han ruma hodi han.

Madalena hakiak nia subrinha sira, oan hosi nia maun rasik, sira hela hamutuk ho Madalena,  nudar inan no hanesan tian, Madalene hili lata, fiu no almunium hirak ne’e hodi hola fali foos atu sira bele han.

“Agora sira sai hotu ba foho, hela hau ho hau nia oan feto haki’ak mak iha ne’e, ne’ebe hahan mak hau araska duni, hahan hau ba husu vizinho sira, vizinho sira fo fos plastik ida ka lata ida ka rua, fo hau tein han maibe ba modo tahan ka mina ne’e laiha, atu ba sosa osan laiha, agora sulan hanesan ne’e araska tiha kedas”, katak Madalena Jose ba Neon Metin, iha loron, 29/4, iha Tasi-Tolu.

Situasaun ne’ebe Madalena hasoru, nia husu ba governu tau matan netik ba kbiit laek sira, atu bele hakmaan netik susar ne’ebe mak Madalane hasoru.

“Hau husu ajuda ba maun boot sira, tau matan  netik mai hau ba, tanba hau hahan laiha, hau atu han saida, hau araska los. Loron kalan mak hau ba tane liman ba vizinhos sira fó foos uituan-uituan.  Agora hau sulan deit hanesan ne’e, hau sente ba ladi’ak, ohin hau sai ba buka nafatin lixu, hanesan, almunium, besi no fiu depois ba tetu iha kompanhia Besi Tua”, tenik Madalena.

Madalene haten situasaun ne’eve agora dadauk Timor infrenta katak iha virus Corona ne’ebe mak bele daet ba ema, maibe tanba tenke kontinua moris, Madalena esforsu an atu bele buka netik osan ba hahan loron ida nian.

Bainhira Madalena sai ba buka lixu, nia la haluha uza maskra maske dalaruma araska oituan tanba dada iis la diak no tenke pasensia.

“Hau uza maskra mos hau dada iis ladi’ak, hau hasai tiha, hau dehan mate-mate ba, hau terus liu tiha ona bainhira hau iha uma de’it. Dadersan hau sempre sai ba João Paulo nia kotuk, hau buka lata, almunium, besi, fiu no seluk tan, nune’e mos hau hili kulsaun aat sira, depois suku di’ak no fa’an fali maibe ema la hola”, tenik Madalena

Madalena haktuir katak antes seidauk iha Estadu Emerjensia [EE] nungka tane liman ba governu sira atu ajuda, maibe tan de’it agora moras Virus Corona ne’e mak tenke sulan an,  maibe senti ladiak, “maun boot sira hau husu favor ida ajuda netik hau ba, tanba hau senti ba labele ona, araska tebes”.

Madalena tetu alumínio, besi no fiu, depois ba tetu iha kompanhia Besi Tua, kilo 1 $0.25 sen, uluk seidauk Estadu Emerjensia ne’e kilo ida $0.50 sen, agora tun ba $0.25 sen.

“Hau nain ba buka rasik hodi ho kosar been mak hau han, osan boot hau la kaer, mais loron ida $1.00 ka $2.00 dollar hau kaer netik, mais agora EE tiha hau nunka mais kaer osan, hau nia familia deit hau husu osan $4.00 dollar de’it, hodi hola hau nia presija.  Ohin hau gasta hotu, aban ema mai sisi ona hau, hau atu lori saida mak selu, to’o hau hanoin barak hau sai tiha ba buka aluminiu, besi, fiu no seluk tan. Ema mak goza tan hau nia kosar been mak iha, to’o ohin loron hau osan laiha, hau sulan de’it hanesan ne’e”, hateten Madalena ho matan been turuk tun ba nia hasan.

LEAVE A REPLY

Please enter your comment!
Please enter your name here