Home Notisia Impaktu Xumba OJE, PR: Kreximentu Kiik Hatudu Ekonomia Lakon Kbiit

Impaktu Xumba OJE, PR: Kreximentu Kiik Hatudu Ekonomia Lakon Kbiit

384
0
situasuan uma komunidade iha area rural. [Foto: Zevonia Vieira | 20.05.2020]

Reportazen Santina Lucia da Costa

Prezidente-Repúblika  Francisco Guterres “Lu-Olo” konxiente katak atividade ekonómika ladún lao, ita-nia produtu internu brutu mós tun. Relatóriu anuál husi ita-nia Banco Central  fó-sai katak ekonomia hahú sa’e uitoan iha tinan kotuk maibé iha tinan ida ne’e tun ba 1%.

“Ekonomia tun tamba fatór lubun ida, hanesan Orsamentu Jerál Estadu (OJE) xumba iha Parlamentu Nasionál no obriga Estadu moris ho rejime duodésimu de’it, udan  boot  ne’ebé  afeta uma-kain lubun ida iha kapitál Dili no iha munisípiu balun, maluk barak tenke hapara sira-nia atividade fila-liman hodi bele hadook-an husi moras COVID-19. Fatór sira ne’e hotu  afeta tebes ita-nia ema-sira ne’ebé moris husi sira-nia negósiu kiik, médiu no boot. Ho rendimentu ne’ebé kiik ka menus, família-sira lakon kbiit hodi sosa ai-han no produtu sira seluk ne’ebé presiza lorloron.” Esplika Prezidente Republika, Francisco Guterres “Lu-Olo” ba Jornalista sira iha Palasiu Prezidensial, loron, 20/5.

Prezidente Republika hateen haree ba situasaun susar ida ne’e Governu Konstitusional Daualu aprova no hahú ona implementa Pakote Ekonómiku ho kuaze $150 Milliaun, hodi responde ba moras COVID-19 no estragus husi udan bo’ot foin lalais ne’e ninia konsekúensia ba ita-nia Povu, iha aspetu ekonómiku-sosiál.

Pakote Ekonómiku ida ne’e ninia objetivu mak atu apoia uma kain ho rendimentu kiik liu dolar atus lima kada fulan no evita empreza sira taka sira-nia atividade komersiál ka hatún saláriu no/ ka hasai traballadór sira.   

Importante hotu-hotu hatene katak Pakote Ekonómiku ida ne’e mak hahalok dahuluk atu hamenus Povu-nia susar balun iha períodu emerjénsia.  Maibé la’ós resposta ba problema hotu-hotu iha rai laran.

Montante $150 Milliaun ne’ebé aprova husi Parlamentu Nasional ba fulan tolu la to’o atu hasa’e kreximentu ekonómiku ida ne’ebé ita hotu hakarak. Prezidente-Repúblika fiar katak VIII Governu halo ona planu ba rekuperasaun sosiál no ekonómika no hahú ona prepara Orsamentu Jerál Estadu ba tinan ida ne’e no ba tinan oin.

“Ha’u fiar no ita hotu-hotu fiar no hanoin katak importante tebes hala’o filafali ita-nia ajenda reforma sosiál no ekonómika atu ita bele hakbiit no sustenta ita-nia ekonomia atu buras babeibeik.” Hateten Prezidente da Republika

Lu Olo hateten ita-nia Estadu labele kontinua funsiona de’it ho rejime duodésimu. Rejime duodésimu nu’udar rejime tranzitóriu ida exekusaun orsamentál nian ne’ebé garante ba tempu badak, funsionamentu servisus públikus, enkuantu la iha Orsamentu Jerál Estadu.

Ho kreximentu ida ke kiik hatudu katak ita-nia ekonomia lakon kbiit; tanba ne’e tenke rekupera fila fali atu fó konfiansa ba ajente ekonómiku-sira hotu. Urjente tebes halo rekuperasaun sosiál no ekonómika.

“Atu bele lao ba oin ho susesu, ita presiza fó atensaun boot liu ba kapital umanu tanba ita-nia ema mak rikusoin boot liu ne’ebé Timor-Leste iha. Hanesan ezemplu, hau temi de’it kona-ba nesesidade atu kapasita ita-nia ema iha área saúde.  Importante tebes kapasita sira ho padraun internasional atu ita-nia profissionál sira bele fó prestasaun servisu saúde ho kualidade aas no hatene fó kedas resposta adekuadu bainhira surtu moras mosu derrepente”, hateten Lu-Olo.

Lu Olo mos hateten Covid-19 ita hare moos kedas sala husi ukun-nain sira kona-ba  la tau atensaun di’ak ba infra-estrutura bázika. Ezemplu ida mak falta bee-moos iha uma-kain no fatin-públiku sira.

“Ita bá hanorin ita nia-ema atu moris ho ijiene, liuhusi fase liman beibeik, maibé  ita-nia ema barak mak la iha asesu ba  bee-moos. Hahalok sala ne’e hahú husi ukun-nain sira ne’ebé la halo planeamentu ba oinsá gasta ho diak OJE ne’ ebé mai husi osan Fundu Minarai”, hateten Lu Olo

Print Friendly, PDF & Email

LEAVE A REPLY

Please enter your comment!
Please enter your name here