Kontributor Mídia RAEOA – ZEESMTL
Hodi hatán ba menus fasilidade atu tulun komunidade iha RAEOA kona-ba luta kontra propagasaun husi surtu Covid-19, Autoridade RAEOA sei aselera kompletamente ba fasilidade hirak ne’ebé povu presiza tebes liuhusi fundus ba luta kontra Covid-19 RAEOA ne’ebé mak prepara rasik husi kamadas hotu iha Oé-Cusse liuhusi ekipa Brigada Soque Covid-19 RAEOA.
“Iha tempu badak, ita sei uza orsamentu COVID-19 no emerjénsia hodi responde disponivel bee moos ba postu saúde, merkadu no edifísiu públiku hodi komunidade bele fase-liman”, hateten Prezidente Autoridade Rejionál Administrasaun Oé-Cusse Ambeno, José Luís Guterres iha enkontru aberta ho kamadas sosiedade hotu loron 29 Maiu 2020 iha Otél Fitun Lima, Oe-Pupu, Oé-Cusse.
Iha sorumutu nee Serbisu Saúde RAEOA relata mos total sidadaun hirak ne’ebe hetan ona tratamentu liu husi fatin akollimentu durante fulan Marsu to’o Maiu 2020 iha Sentru Akollimentu tolu, hanesan Otel Lifau, Otel Cinco Estrela, no Rezidénsia Fulolo.
“Entre ema 201, ita suspeita ema nain 29 no foti sira-nia amostra hodi teste iha laboratóriu nasionál. Maibé, rezultadu hotu negativu, no to’o ohin loron hela de’it na’in 10 mak nafatin hela iha sentru akollimentu hodi kompleta loron 14”, sublina Diretór Saúde RAEOA Interinu Luis Neno.
Bazeia ba orientasaun husi Ministériu Saúde, Dirijenti Serbisu Saude RAEOA foti ona amostra 1% husi totál populasaun RAEOA hamutuk 73.716 habitantes hodi halo teste. Rezultadu teste ba amostra husi ema 71 depois halo teste iha laboratóriu nasionál hatudu rezultadu negativu. Ho nune’e, temporariamente RAOEA sei livre husi COVID-19.
“Ami iha planu atu hala’o teste públiku ba ita-nia populasaun sira iha postu saúde, klínika no sentru saúde sira. Bainhira ita hetan ema ruma iha sintoma ba COVID-19, ita sei lori sira ba Sentru Akollimentu no Sentru Izolamentu iha Klínika Korasaun”, salienta Luis Neno
Iha parte seluk, hodi hatán ba iha apoiu umanitária ba Povu Atoni, Autoridade RAEOA liuhusi autorizasaun Prezidente RAEOA, José Luis Guterres orienta ona ba ekipa Apoiu Umanitária COVID-19 RAEOA hodi bele fó asisténsia umanitária ba povu kbiit laek sira durante aplikasaun Estadu Emerjénsia.
“Benefisiáriu 1,161 mak hetan ona apoiu umanitária ba nesesidade bázika iha Suku 18 no aldeia 63 durante estadu emerjénsia iha RAEOA” katak Koordenadór Servisu Apoiu Umanitária COVID-19 RAEOA, Agostino Caet
Apoiu Umanitária hirak ne’e distribui ona ba orfanatu, estudante no komunidade kbiit laek sira tantu iha Dili no Oé-Cusse ne’ebé hetan mós tulun husi Sentru Lojístika Nasionál (CLN) foos saku 1.000 ho ninia kompozisaun 250 saku ba Oé-Cusse oan sira ne’ebé hela iha Dili no 750 saku ba RAEOA
Reprezentante lider Komunitáriu, Xefe Suku Naemeco, Marcos orgullu ba medida resposta ne’ebé rápida husi Autoridade RAEOA hodi atua ho rápidu asisténsia umanitária ba komunidade sira iha sira-nia suku no aldeia idak-idak.
” Durante surtu COVID-19 no Estadu Emerjénsia, ami-nia komunidade kbiit laek sira hetan apoiu umanitária husi ekipa apoiu umanitária husi Komisaun COVID-19. Ha’u agradese ba apoiu umanitária ne’e”, deklara Xefe Suku Naemeco.
Iha biban ne’e, Prezidente Autoridade mós rekoñese katak RAEOA agora daudaun sei utiliza Dotasaun Orsamentu Temporáriu tanba ne’e autoridade seidauk bele realiza programa ne’ebé sei fó benefísiu direita ba komunidade.
“Komunidade-nia problema báziku mak ne’e, bee no saneamentu, edifísiu eskola ne’ebé la favoravel ba estudante atu estuda, falta postu saúde, no liu-liu estrada atu komunidade bele fa’an sira-nia produtu lokál hodi hadi’ak sira-nia rendimentu família”, dehan LUGU.
