Reportazen Raimundo Seguerau
Relasiona desizaun governu hodi loke hikas atividade relijiaun iha Estadu Emerjensia (EE) faze datoluk nian, nune’e igreza katolika iha Timor-Leste hahu fila fali atividade misa hanesan baibain, maibe nafatin kumpri regra ne’ebe mak Ministeriu Saude fo sai, hodi preven an hosi moras surtu Covid-19, hodi uza nafatin maskra no halo distansia fiziku.
Arsebispo Metropolitan Diocese Dili, Dom. Virgilio do Carmo esplika katak Estadu Emerjensia ba faze datoluk hanesan espasu ida, ema hotu liu-liu sarani sira atu bele book-an, hodi hala’o atividade sosiál, liu-liu misa importante tenke kumpre regra EE.
“Sarani sira tenke hakas-an nafatin, atu kumpre normas orientasoes, atu nune’e bele la’o hamutuk iha dalan ne’ebé loos no saudavel”, dehan Virgilio iha esplikasaun omilia iha igreza Katedral, Dili, Domingo (31/05).
Situasaun ida ne’e, nia dehan, “ema hotu preokupa iha buat oin-oin, katak pandemia ida ne’e bainhira mak nia laiha, bainhira mak fila fali ba situasaun normal, ita bele hasai maskra, ita bele kaer liman no bele halakon duvidas no tauk sira”.
