Reportajen Adroaldo “Saretukau”
Relasiona ho re-ativasaun grupu arte marsiál hanesan KORK, PSHT, IKS no sira seluk ne’ebé loke dalan atu sira bele hala’o sira nia aktividade sira, Komandante Polísia Eskuadra Dom Aleixo, Amerco Fatima da Costa, husu atu líder arte marsial ida-idak tenke rejistu iha sira nia aldeia, suku ka fatin ne’ebé sira hala’o atividade ba, atu nune’e fasil ba parte seguransa PNTL bele atua ho lalais no fasil wainhira mosu problema ruma.
Komandante Amerco Fatima da Costa hateten, ho atividade arte marsiál sira ne’ebé hahú legaliza hosi governu, parte seguransa nian ezekuta orden hosi estadu, saída mak estadu halo sira nia parte apoiu no asegura.
“Ami mos husu ba arte marsial sira ne’ebé mak re-ativa fali ona ne’e sira tenki rejistu ba sira nia xefe aldeia, xefe suku, autoridade lokal sira, sira nia pelatih ne’e halo nusa, ni-nia ema hamutuk hira para ita fasil atu kontrola i problema ruma mosu karik atendimentu ne’e lalais,” dehan Amerco.
Nia hatutan, sira nu’udar autoridade seguransa apoiu atu povu ne’e la’o livre, hakmatek no seguru, “ami mos fo nafatin asisténsia ba ita nia povu sira ne’ebé presiza ami nia asisténsia ruma, ami prontu 24 oras, bainhira sira presiza ami nia apoiu, ami prontu,” nia akresenta.
Nia hatete, iha postu Dom Aleixo mosu problema arte marsial barak hanesan kazu UNPAZ, iha Ai-mutin, Kampu Alor, tanba grupu sira ne’e hamosu dezintendimentu ba malu, tanba ne’e líder seguransa Dom Aleixo ne’e husu atu líder arte marsial sira rejistu iha líder lokal sira atu nune’e mosu problema ruma karik sira fasil rezolve.
“Atu sufisiente ka la sufisiente, ami autoridade seguransa prontu, la sufisiente ne’e la’os dezafiu ba ami, maibé motiva ami halo servisu di’ak liu, mai nia lojístika la sufisiente mos ami prontu halo servisu nafatin,” dehan komandante Amerco.
Nia mos husu ba komunidade sira atu bele kria relasaun di’ak nafatin ho parte seguransa atu bele hato’o keixa ka asuntu saída de’it relasiona ho kestaun seguransa no kriminal nian, Amerco hakotu.
