Reportajen Adroaldo “Saretukau”
International Media Support (IMS) servisu hamutuk ho UNESCO (The United Nations Educational, Scientific and Cultural Organization) realiza treinamentu liu hosi webinar konabá Ambiente no Mudansa Klimátika ba jornalista no media selesionadu iha Sudeste Aziátiku, oinsá hasa’e kapasidade jornalista no media nian ba halo kobertura ka reportajen konabá isu Ambiente no Mudansa Klimátika.
UNESCO nia Espesialista Programa ba Dezenvolvimentu Media, Marco Xu Jing, kontente hasoru partisipante sira hosi media selesionadu sira iha treinamentu ida ne’e. Nia kontente mos kolabora ho IMS ba iha programa treinamentu ambiente no mudansa klimátika hodi dezenvolve media sira iha Sudeste Aziátiku.
“Sudeste Aziátiku hanesan rejiaun ida ne’ebé impaktu barak mos iha dezastre natural, tan ne’e media hanesan xave ba impaktu ba mitigasaun mudansa klimátika, adaptasaun nomos iha redusaun risku dezastre. Iha kontextu ida ne’e, programa treinamentu ida ne’e dezena atu hasa’e kapasidade media ba halo reportajen ka kobertura ba mudansa klimátika no risku dezastre ambiente,” dehan Marco, iha loron dahuluk treinamentu liu hosi webinar, tersa-feira, 30/05.
Sorin seluk, Henrick Grunnet, IMS nia Media Advisor hato’o, sira hala’o suporta ba media sira iha mundu, no treinamentu ida ne’e sei haree liu ba ambiente no mudansa klimátika. Nia hatete IMS servisu hamutuk ho UNESCO ba treinamentu ida ne’e, no UNESCO mak hola inisiativa ba programa ida ne’e, dehan Henrick iha nia abertura ba treinamentu.
Partisipa iha webinar ne’e hosi media selesionadu iha Sudeste Aziátiku hosi Indonézia, Malázia, Tailándia, Filipina inklui Timor-Leste hosi media online Neon Metin no Rádiu Loriku. Webinar refere hala’o durante loron rua, 30-31 Maiu 2023, no ikus sei iha Boot Camp iha fulan Agostu durante loron 5 iha Java, Indonesia.
