Reportazen Raimundo Seguerau
Organizasaun Naun Governamental Timor-Leste La’o Hamutuk konsidera situasaun Covid-19 sai hanesan pontu refleksaun ida ba ukun-na’in sira, hodi halo investimentu ba setór agrikultura no saneamentu.
Peskizadór La’o Hamutuk, Celestino Gusmão dehan setór agrikultura nu’udar setór ida ne’ebé importante tebes ba povu nia moris, tanba durante estadu emerjensia povu barak preokupa kona-ba ai-han.
“Situasaun ida ne’e hanesan lisaun ida ba ita, para tau matan ba asuntu agrikultura nian produsaun, populasaun iha kbiit para halo produsaun, hakbiit oinsá, hadia irigasaun, iha mekanismu produsaun hanesan fini”, dehan Celestino ba Online Neon Metin iha PN foin lalais ne’e.
Nia haktuir durante estadu emerjensia povu levanta hamlaha, difikuldade a-ihan ba sira nia moris inklui bee moos. Tanba tinan barak ita la tau atensaun ba bee no saneamentu. Se ita hakarak ita nia povu ne’e seguru bee importante ba sira nia moris.
Fasifilidade sira ne’ebé estabelese iha fatin-fatin hanesan tanki, kuaje apoiu husi anjensia internasional sira. Ida seluk kona-ba edukasaun no saude, ita la tau atensaun durante tinan barak nia laran. Ita atensaun liu ba aeroportu, ponte no buat seluk tan.
“Osan barak ne’ebé tau iha aeroportu Suai no Oecusse, ne’e mak ita halo ba iha bee no saneamentu karik, oras ne’e ita la reklama kona-ba bee falta saneamentu falta”, nia lamenta.
Se ita investe barak ba iha saude karik ita lapresiza reklama kona-ba laiha fatin ba kuarentena, fatin ba izolamentu. Agora aeroportu ita lauza, ne’ebé ita presiza aranju polítiku liga sosiu ekonomiku ne’ebé refleta ba realidade moris.
