Reportajen David da Costa Gusmao
Prezidente Partidu Congresso Nasionál de Reconstrução Timorense (CNRT), Kay Rala Xanana Gusmão fiar katak, Dr. Jose Ramos Horta ne’ebe eleitu nu’udar Prezidente Republika ho nia esperiénsia no matenek, bele hadia estadu demokrátiku ida ne’e
“Ami fiar Prezidente eleitu Ramos Horta ho ita boot nia esperiénsia, ho ita boot nia matenek, povu fiar katak sasan ne’ebé halo ita-nia rai susar uitoan, ita boot bele korrije, bele hadi’a, klaru liuhosi mekanismu ne’ebé ita boot sei trasa bainhira ko’alia ba povu iha ita-nia tomada de pose, maibé ami fiar tebes, ita hotu fiar ho vitoria ida ne’e, povu nia vitoria, la’ós Ramos Horta nia vitoria, povu mak manan, povu nia desizaun maka prevalese, hodi husu ba José Ramos Horta dehan katak hadi’a tiha estadu demokrátiku ne’ebé atu naksobu ne’e”, Dehan Xanana liuhosi konferensia imprensa iha sede kandidatu Prezidente Republika, Ramos Horta iha Hudi Laran, Kinta 21/04.
Nune’e mós Kay Rala Xanana Gusmão sente kontente tebes, tanba povu hotu ezerse sira-nia direitu hodi fo konfiansa ba kandidatu Prezeidente Repúblika (PR), Ramos Horta manan liuhusi eleisaun segunda ronde
“Agora ha’u sente kontente ne’e tanba Ramos Horta manan, ha’u sente kontente tebes tanba povu ezerse nia direitu, hodi fó konfiansa ba Ramos Horta, ida ne’e mak halo hau kontente los”, Dehan Xanana.
Maibé Xanana hatete, nia kontente tebes la’ós tanba José Ramos Horta manan, maibe kontente tanba povu ezerse nia direitu, hasai desizaun liuhusi eleisaun no povu deside Ramos Horta mak sai Prezidente iha periodu 2022-2027
Enkuantu Xanana mós agradese tebes ba povu tomak ne’ebé iha maturidade polítika, liliu ba joven sira, tanba baibain temi dehan katak joven sira mak sei sai futuru ba Timor ne’e, foin daudauk iha loron hira ne’e joven timoroan sira hatudu duni katak, sira hadomi rai ida ne’e, sira hadomi povu ida ne’e, la book malu, la sura ba malu.
“Ha’u sente kontenti liutan tanba durante eleisoens ne’e iha estabilidade no la iha violensia”, dehan nia.
