Reportajen David da Costa Gusmao
Kandidatu Prezidente da Republika (RP) ,Dr. Jose Manuel Ramos Horta agradese ba CNRT, Xanana Gusmao, partidu polítiku sira seluk no povu sira ne’ebe maka fó ona konfiansa ba nia, hodi eleitu ba Prezidente Republika Timor-Leste períodu 2022-2027.
Liuhusi konferénsia imprensa, Dr. Ramos Horta hateten agradese ba hot-hotu nia apoiu no konfiansa, ba kandidatura ne’ebe ohin eleitu ba Prezidente Republika,” kandidatu Eleitu Prezidente Republika Jose Ramos Horta hato’o ida ne’e iha sede apoiu Horta ba Prezidente Republika, 21/04
“Agradese ba jovens sira, ferik no katuas sira, balun husi CNRT, balun hosi partidu sira seluk, no balun husi movimentu sira. inisiativa sira rasik hodi tun ba iha aldeia, suku no halo door to door, loro-loron”, dehan Horta
Horta mos dehan ne’e hanesan lisaun boot ida diak ba demokrasia, haree mos hanesan todan boot ba nia , para halo buat hot-hotu iha nia kapasidade tuir poder, para labele falla, labele ameasa no traisaun fali ba povu nia konfiansa, no povu nia espetativa ka sira nia hakarak.
“Povu ne’e nunka husu barak, hau nia esperiénsia rasik tinan 10 nia laran, kuandu ba foho, ba aldeia, dala barak, kuandu ita koalia ho povu, sira la husu buat barak, triste liu dala ruma buat kiik sira husu ita la konsege fo ba sira, ne’e duni liman ain Prezidente nu’udar ho nia knaar buka serbisu, hametin, ba maun Xanana ho lider nasional sira, no partidu politiku iha Parlamentu ou liur. ho grupu arte marsial no arte ritual, ita nia xefe suku no xefe aldeia sira, ita nia intelektuál sira, universitáriu , sektór estadu no privadu, avansa para ita bele hakmatek diak liu tan, hakle’an dame iha rai ida ne’e, no hakle’an hametin ita nia instituisaun demokrátika” nia esplika.
