Reportazen Francisco JDA
Centru Informasaun Impaktu Covid-19 (SIIC) hala’o konferensia hodi relata situasaun kona ba fundu petroliferu iha situasaun Covid-19, hosi fulan Marsu too Abríl fundu petroliferu lakon $800 miloens Dólar Amérika nian, tanba lock down neebe aplika ba nasaun barak, halo atividade ekonómika la lao.
Presidente Konselho Konsultivu Fundu Petroliferu (KKFP), Juvinal Dias ba Jornalista sira hateten, folin mina rai dadaun ne’e sa’e oituan no nia implikasaun ba folin mina menus oituan, tanba rezerva Bayu Udan menus.
“Ho presu mina rai ne’ebé nafatin la sa’e makas, fo implikasaun ba futuru kampu Greater Sun Rise no kampu Bayu Undan. Ho situasaun sira hanesan ne’e, ami hakarak alerta ba governu hahu ona polítika investimentu ne’ebé la depende makas liu ba seitor petroliferu, mesmu sai hanesan fonte rendimentu di’ak ida, atu hanoin ona ekonomia seluk. Maske lakon $800 miloens maibé governu seidauk halo levantamemtu”, esplika Juvinal Dias iha Salaun FONGTIL Kaikoli 02/06.
Juvinal Dias hatutan katak fundu petroliferu ne’e rekursu uniku ne’ebé Timor-Leste iha maibe la Jere ho didiak, hakarak foti de’it, la antisipa no la kalkula ba merkadu finanseira nian, hamosu problema ba fiskal tinan hirak mai.
“Kona ba osan subsidi ba komunidade ne’e importante, espesialmente ba sira ne’e depende ba rendimentu la klaru no la regular, objetivu ida ne’e atu aumenta poder kompras komunidade nian, problema governu nian la’ós intensaun atu selu, maibé governu nia orsamnetu estadu mak seidauk iha. Depende ba orsamnetu duodesimu no orsamentu fundu Covid-19 $250 miloens. Osan balun uza ba Covid-19 no balun uja ba duodesimu”, hateten Juvinal Dias.
