Reportazen Zevonia Vieira
Vice-Prezidente Parlamentu Nasional (Vice PPN), deputada Maria Angelina Sarmento, lamenta ho reportajen falsu ida ne’ebé jornal online ida ho naran Loluwari.Com publika.
Reportajen falsu ida ne’ebé aparese atu hanesan ho notisia jornalistiku, ne’ebé mak website falsu ida públika iha loron-31 Maiu 2020 liu ba no fahe tutan iha mídia social (Facebook), husi ID Facebook Loluwari Assosiasaun, halo ho títulu “Maria Angelina: La Espera Katak Formasaun ba Gubernu membros barak liu ba kargu husi FRETILIN. Ne’e INJUSTISA bo’ot ida. “Lahatene se KOLIGASAUN lao to’o rohan ka lae.”
Títulu ka headline ida ne’e hatun ho fotografia ida husi Vice-Prezidente Parlamentu Nasional, Maria Angelina Sarmento fo hela intrevista ba jornalista sira, iha sala plenaria parlamentu nasional nian.
Vice-Prezidente, deputada Maria Angelina Sarmento klarifika katak hare husi maskra ne’ebé mak nia uza, f foto tuan ida. “Hau lembra katak maskra ho kór ida ne’e, ha’u uza ba dala ikus liu iha Tersa feira loron 12 Maiu. Iha loron ne’ebá, ha’u fo duni intrevista ida ba jornalista sira iha sala plenaria parlamentu nian kona-ba prazu loron 5 ba ajendamentu votasaun ba pedidu destituisaun, ne’ebé Prezidente Parlamentu Nasional altura ne’ebá seidauk fo sinal ruma atu konvoka plenaria.”
Liu hosi komunikadu imprensa ne’ebe Neon Metin asesu Vice PPN hateten katak durante ne’e nungka halo intrevista ba mídia ruma, kona-ba aranju sira ligadu ho prosesu indijitasaun no nomeiasaun ba membru governu sira ne’ebé mak halo husi PLP, FRETILIN ho KHUNTO.
“Sa tan wainhira hau fo intrevista ba mídia sira iha sala plenaria nian. Tamba iha ne’ebá, ha’u sempre hetan akompañmentu husi ofisial mídia bankada parlamentar PLP nian, ne’ebé sempre halo gravasaun atu asegura labele iha reprezentasaun sala ka reportajen ne’ebé mak lalos husi mídia ruma,” Vice-Prezidente Parlamentu hatutan.
Liu hosi komunikadu imprensa Vice PPN deklara katak reportajen ida ne’e kompletamente falsu no halo husi ema iresponsavel sira ne’ebé mak hakarak atu soran deit partidu polítiku sira PLP, FRETILIN no KHUNTO ne’ebé oras ne’e hamutuk hodi viabiliza no garante VIII Governu Konstitusional bele kontinua serbisu ba povu Timor-Leste to’o ninia mandatu nia rohan iha tinan-2023.
“Ha’u hakarak mós aproveita atu halo apelu ba Timor oan tomak, atu hapara ona halo jogu polítiku foer ho baratu no la edukativu sira hanesan ne’e, tamba ida ne’e la’os modelu ambiente polítiku no demokrasia lolós ne’ebé ita hakarak atu harii iha Timor-Leste, tamba ne’e la merese ema ruma atu fiar informasaun falsu no tendensiozu sira hanesan ne’e.” deputada Maria Angelina Sarmento konklui.
