Reportajen Joselina dos Santos
Kazu moras dengue kontinua aumenta aas, hahú husi fulan Dezembru 2021 to’o ohin Janeiru 2022, ne’ebe fó ameasa ba ema nia vida, liu-liu ba labarik sira no halakon ema balun nia vida iha Hospital Nasional Guido Valadares, inklui Sentru Saúde sira seluk iha Díli laran.
Neon Metin ba halo observasaun direita iha Sentru Saúde Formoza , hatudu katak pasiente moras dengue hahú nakonu, nune susar atu hetan atendementu ne’ebé di’ak, ne’e duni Profesionál Saúde sira servisu hamutuk Servisu Saúde Munisipiu nian, hodi muda pasiente balun ba iha Sentru Saúde Vera-Cruz hodi halo prevensaun ba moras dengue.
Situasaun real ne’ebe pasiente sira hasoru, tanba fatin limitadu tebes, nune’e iha pasiente nain 2 tenke toba hamutuk iha kama ida, hodi hetan tratamentu di’ak.
Relasiona ba Situasaun ne’e, Neon Metin entrevista ho Xefe Departamentu Emerjénsia HNGV, Doutór Vidal Lopes katak situasaun real ne’ebe mak pasiente sira, hasoru liu-liu ema nain rua tenke toba hamutuk iha kama ida, ne’e tanba fatin limitadu, maibé la signifika katak parte diresaun nonook de’it maibe Konsellu Diretivu foti ona alternativa koordena ho Servisu Saúde Munisipiu nian, hodi oferese Sentru Saúde Vera-Cruz ba sala izolamentu ba Covid-19, mais agora ne’e esterizadu ona, konvente ona hodi atende ba kazu dengue atu halo preventiva.
“Ha’u apela ba komunidade sira keta hakfodak, tanba Sentru Saúde Vera-Cruz ne’ebe uluk izolamentu ba pasiente Covid-19, maibe agora ne’e esterizadu no sai Sentru ba dengue, tanba ne’e husu ba inan aman sira keta hakfodak karik oan ka ita nia ema sira ba tratamentu iha Vera-Cruz karik keta dehan Kovid-19, maibe tanba espasu Limitadu ne’e mak muda ba Sentru Vera-Cruz hodi halo tratamentu,” Dehan Doutor Vidal ba Neon Metin iha nia kna’ar fatin Emerjénsia HNGV Bidau, 06/2022.
