Home EduTek COVID-19, ETV 28 de Novembru, La Asesu Bee Moos Hodi Fasilita Estudantes...

COVID-19, ETV 28 de Novembru, La Asesu Bee Moos Hodi Fasilita Estudantes Fase Liman Ho Sabaun

236
0
Ekipa klinika jurnalismu halo entrevista iha ETV 28 de Novembru. [Foto: EKJ |24.09.2020]

Reportazen Ekipa Klinika Jurnalismu UNTL-UNESCO

“Problema boot mak susar atu asesu bee mos, entaun pratika fase liman ho sabaun la halo. Husu ba Ministeriu Edukasaun para bele resolve nesesdade eskola nian, liu-liu konaba bee moos”. Abilio

Pandemia COVID-19 ne’ebe to’o ohin loron Organizasaun Mundial Saude (OMS) sedauk hetan solusaun konaba vacina, atu bele ajuda prevene ema hosi virus Corona. Nasaun boot sira kada loron kazu konfirmadu kontinua aumenta, lockdown kontinu implementa, eskola sira taka prefere halo eskola online hodi evita estudante la kona virus Corona.

Oinsa iha Timor-Leste, maske konsege fila ba kazu zero maibe Ministeriu Saude kontinua husu ba populasaun atu implementa protokolu COVID-19 hanesan iha eskola, merkadu, loza no fatin publiku sira seluk.

COVID-19 laos afeta deit ba ema nia saude, maibe afeta mos ba seitor edukasaun tanba Organizasaun Mundial Saude hasae protokolu ne’ebe parte ida dehan tenke halo distansia fiziku no sosial.

Ekipa Klinika Jurnalismu (EKJ) halo observasaun direta no nota katak iha Eskola Tekniku Vocasional (ETV 28 Novembru, sedauk iha faslidade saude nian ne’ebe eskola ne’e uza hodi preven-an hosi virus Corona.

EKJ dadalia ho Diretor ETV 28 Novembru, Pedro da Silva Ximenes konaba kondisaun ne’ebe iha, ba EKJ nia konfesa katak sente preokupa ho problema ne’e

“Pandemia COVID-19 ne’e problema mundial no ema hotu hatene, especialmente eskola ida ne’e iha prolema lubuk ida maka ami hasoru, baihira atu reativa fali eskola ida ne’e. Ami iha eskola ida ne’e hasoru difikuldade barak, tuir Organizasaun Saude Mundial (OSM) dehan katak ita tenki iha distansia sosial no uza Maskra no tenki fase liman bebeik ho sabaun”, hateten Diretor ETV iha nia knaar fatin Becora, 22/09.

Nia konfesa katak iha eskola refere atu pratika konaba ijiene susar oituan, tanba eskola ne’e laiha bee moos no ida ne’e sai difikuldade mai ami, “maibé ami la’os nonok deit, ami organiza malu, oinsa maka hodi mantein nafatin kriteira husi OMS, hodi nune’e tama hotu kriteriu, hodi nune’e eskola ne’e reativa fali iha dia 23 de Junho 2020”.

Nia haktuir tan katak sira mós mantein nafatin distansia social no fiziku, tanba sira nia alunu oituan iha sala ida masimu nain 35, sira mantein nafatin distansia sosial husi OMS maibé iha sala laran barak 23/20 no kriteira distansia social ne’e bele aplika.

“Ami mós mantein distansia sosial tamba ami nia estudante menoria liu no fasil ami atu halo distansiamentu sosial no kada aula akumula estudante maximu nain 35 no minimu 20, maibe la iha bee atu fase liman no la hetan apoiu ruma husi entidades governo nian, maibe so uniku ami hetan apoiu husi Crus Vermelha Timor-Leste (CVTL).

Diretor ne’e mos konfesa katak problema seluk ne’ebe hasoru mak konsiensia uza maskra, iha inisiu bainhira eskola ne’e reativa alunus hotu uza maskra, maibe bainhira kazu iha Timor laiha ona, alunus sira mos barak la uza ona maskra.

Total estudante ne’ebe eskola iha fatin refere iha 446 no sira ezije ba governu atu moru hodi haleu eskola ne’e no presiza iha seguransa hodi tau matan eskola ETV, tanba animal barak tama mai hodi estraga fasilidade eskola nian.

Ekipa Klinika Jurnalismu dadalia ho estudante Abilio da Costa, hosi departamentu Informatika, agora dadauk iha 3ano, iha desimu ano hateten katak, iha pandemia COVID-19 mos afeta ba prosesu aprendizajen tanba difikulta sira nia estudu.

“Ami mantein nafatin distansia sosial, tamba estudante menus no distansia sosial ami kumpri maibe kolega besik sira ita ransu dalabarak la halo distansia fiziku”, hateten Abilio.

Abilio dehan problema boot mak susar atu asesu bee mos, entaun pratika fase liman ho sabaun la halo. Husu ba Ministeriu Edukasaun para bele resolve nesesidade eskola nian, liu-liu konaba bee moos.

Estudante Agusta de Jesus Carvalho, hosi Departamentu Arte Grafika relata katak ami iha eskola 28 de Novemro mantein nafatin distansia sosial hodi prevene-an husi moras COVID-19, tanba OMS fahe informasaun atu mantein distansia fizku no sosial, tenke fase liman bebeik ho sabaun no uza maskra.

Maibe Agusta konfesa katak realidade iha eskola bee moos laiha, ho nune’e kriteiru ne’ebe fo sai hosi OMS no Ministeriu Saude labele halo tuir.

*(Leonardo da Cruz, Juliu De Jesus Fernandes no Jenito da Costa nudar estudante UNTL ne’ebe partisipa formasaun iha klinika jurnalismu ne’ebe realiza hosi UNTL-UNESCO, ho nune’e mentor publika sira nia artigu iha neon metin).

LEAVE A REPLY

Please enter your comment!
Please enter your name here