Home EduTek COVID-19, Eskola 5 de Maiu Semana 1 Tama Dala 3, Estudantes Triste...

COVID-19, Eskola 5 de Maiu Semana 1 Tama Dala 3, Estudantes Triste Tanba La Aprende Materia Ho Diak

238
0
Ekipa klinika jurnalismu UNTL-UNESCO halo entrevista iha eskola Jeral 5 de Maiu Becora. [Foto: ekipa klinika jurnalismu | 24.09.2020]

Reportazen ekipa klinika jurnalismu UNTL-UNESCO

Pandemia COVID-19 ne’ebe afeta mundu tomak, virus ne’ebe akontese dahulu iha rai Wuhan China, ho naran COVID-19 (SARS-CoV-2) ou konnesidu ho Corona.

Virus ne’ebe bainhira akontese halo ema barak paniku no tauk tanba ema balun ne’ebe afeta virus ne’e balun konsege mate tanba imunidade tun ka iha moras seluk iha isin lolon.

Bainhira virus ne’e akontese nasaun maioria nasaun boot sira taka odamatan ba ema estranjeiru sira ka halo lockdown hodi limita movimentu no eskola barak tenke taka no halo online school ka eskola hosi uma ho uza internet.

Iha Timor Leste afeta mos ba prosesu aprendizajen tanba Ministeriu Saude no Organizasaun Saude Mundial (OMS) hasai protokolu COVID-19, hodi nune’e populasaun bele halo prevensaun hanesan iha fatin eskola, merkadu, loza, igreja no instituisaun publiku sira.

Ekipa klinika jurnalismu halo observasaun no entrevista direita iha Eskola Sekundario Jeral (ESJ) 5 de Maio Becora-Dili, hodi hare proseu aula durante iha propagasaun COVID-19. Tuir komentariu sira ne’ebe akumula hosi estudante sira katak la kontente ho situasaun agora, tanba lakon materia barak no fo impaktu ba sira atu aprende.

Klinika jurnalismu dadalia ho estudante Delsia Luisa da Costa Pereira, konaba situasaun iha eskola, nia hateten durante period estadu emerjensia sira labele aprende materia ho diak no prezudika tebes ba sira durante prosesu aula.

“Ami senti triste tebes tamba durante COVID-19 iha Timor-Leste, liu-liu iha periodu estadu emerjensia ida ne’e, ami iha Eskola 5 de Maio labele aprende prosesu aula ho di’ak, tamba semana ida, ami tama aula loron tolu de’it”, hateten Delsia ba ekipa klinika jurnalismu iha  ESG 5 de Maio, Segunda, (21/09).

Iha sorin seluk mós estudante Lucas dos Santos Ximenes salienta katak durante estadu emerjensia ida ne’e, ami labele aprende ho di’ak, tamba materia hakat mak barak hodi fó impaktu mai ami estudante sira.

“Ami nia prosesu aula iha eskola ida ne’e, difikulta tebes ba ami nia aprende, tamba labele aproveita ho di’ak durante estadu emerjensia ida ne’e”, tenik Lucas.

Hatan ba preokupasaun sira ne’e, Adjunta Diretóra ESG 5 de Maio Becora, Maria dos Santos esplika durante estadu emerjensia liuhusi Ministeriu Edukasaun Juventude no Desportu (MEJD) avizu katak eskola hotu-hotu sei halao prosesu aula, kada semana ida dala tolu, hodi minimiza estudante sira atu bele kria nafatin distansia sosial no fiziku.

“ESG 5 de Maio kontinua aplika hela distansia sosial no fiziku, fase liman, uza maskra no iha ami nia eskola refere durante prosesu aprendizajen, kada aula ida iha estudante 30, atu mantein nafatin regulamentu sira ne’ebé fó sai ona husi OMS”, esplika Adjunta Maria.

Adjunta ne’e haklean liután, iha ESG 5 de Maio iha estudante defisiensia fiziku nain rua, maibé sira ho kondisaun diak, hodi tuir prosesu aprendizajen hanesan estudante sira seluk.

ESG 5 de Maio Becora ho total estudante 2017, sala aula hamutuk sia (9), konta ho biblioteka no palku ne’ebé durante halao atividade ruma no total manorin hamutuk 54.     

Iha fulan Marsu to’o Junhu Timor-Leste konsege hetan kazu importasaun hosi ema sira ne’ebe mai hosi nasaun afetadu hamutuk 24 no konsege resolve no to’o ohin loron kazu zero ka sedauk iha kazu konfirmadu foun.

Dadus global COVID-19 ne’ebe hasai hosi OMS iha loron 24 Septembru nian hatudu kazu konfirmadu COVID-19  total 31,664,104 no mate hamutuk 972,221.

*(Cesar Gama de Jesus ho Joanina Casamiro nudar estudante UNTL ne’ebe partisipa iha klinika jurnalismu ne’ebe organiza hosi UNTL-UNESCO, ho nune’e mentor publika sira nia artigu iha neon metin)

LEAVE A REPLY

Please enter your comment!
Please enter your name here