Home Notisia Editor Club AJTL, Buka Solusaun Hamenus Dezempregu Iha Propagasaun COVID-19

Editor Club AJTL, Buka Solusaun Hamenus Dezempregu Iha Propagasaun COVID-19

278
0
AJTL no KI hasae foto hamutuk ho SEJD no Diretor Empregu SEFOPE. [Foto: Santina Lucia da Costa | 24.05.2020]

Reportazen Marcio Morato Pinto

Asosiasaun Jornalista Timor Lorosa’e (AJTL) realiza editor club discussion ba dala neen ho topiku Buka Solusaun Ba Numeru Dezempregu Juventude Ne’ebe aas Durante Periodu Propagasaun COVID-19.

Liu hosi abertura Prezidente AJTL, Zevonia Vieira hateten estrutura AJTL iha responsabilidade boot hodi kontinua halao atividade sira ne’ebe bele tulun nia membru sira, atu hasai sira nia konnesmentu no aumenta sira nia intelktualidade liu hosi diskusaun sira hanesan.

“Hasae jornalista ho editor sira nia abilidade ne’e importante tebes, laos hatene deit kona asumtu tekniku deit maibe asumtu importante sira relasiona ho dezempregu no joven ne’e importante tebes, atu nune ajuda sala redasaun bele hakerek artigu ne’ebe los no kritiku hodi publika”, hateten Zevonia iha salaun Konsellu Imprensa, 23/09.

Entretanto Prezidente AJTL haktuir katak durante propagasaun COVID-19 laos fó deit impaktu ba ema nia saúde, maibe bele fó mos impaktu ba ema nia aktividades negósiu no mos empregu sira. Ho nunee maka AJTL ohin konvida reprezentante goveru husi Sekretaria Estadu Formasaun Profisionál no Empregu (SEFOPE) no Sekretariu Estadu Juventude no Desportu (SEJD) hodi hatoo sa solusaun mak bele responde, hodi la fo impaktu ba joven sira sai dezempregu.

“Ohin ita bolu representante Governu sira mai atu hatoo polítika saida maka sira sei halo, atu buka solusaun hodi hamenus dezempregu iha rai laran, liu-liu iha situasaun propagasaun COVID-19 nian”, hateten Zevonia

Prezidente AJTL agradese ba TVE-T ne’ebe kontinua iha komitmentu hodi koopera ho AJTL, ba Konsellu Imprensa ne’ebe kontinua apoiu liu hosi hanoin sira ne’ebe konstruktivu no agradese mos ba UNDP ho governu Korea liu hosi agensia KOICA ne’ebe kontinua apoiu atividade ida ne’e hodi kontinua lao, ho objetivu hakarak ajuda dezenvolve media Timor-Leste.

Hare ba problema ida nee, Prezidente Konsello Imprensa (KI), Virgílio Guterres tenik katak, juventude sira ne’ebe maka dezempregu, sai nudar preokupasaun ema hotu nian,  governu presiza hare hodi halo jestor polítika ba rekursus sira ne’ebe iha no oinsá bele desentraliza ka evita kestaun urbanizasaun ne’ebe afeta ba juventude sira mai konserta hotu iha sidade Díli.

“Solusaun ida atu redus dezempregu mak tenke investe boot iha edukasaun no presiza hadia kualidade edukasaun ne’ebe prepara ema atu iha future halao serbisu no bele kria serbisu ba nia rasik”, hateten Prezidente KI

Orador ba editor club ba edisaun ne’e orador mak Sekretariu Estadu Juventude no Desportu, Abro Saldanha, Diretor Nasional Emprego Interior no Iginio Fereira. Programa ne’e hetan apoiu finansei hosi UNDP no governu Korea liu hosi agensia KOICA, serbisu hamutuk ho Konsellu Imprensa no TVE-T.

*(Marcio Moratu Pinto nudar estajiadu iha media RENETIL-Neon Metin)

Print Friendly, PDF & Email

LEAVE A REPLY

Please enter your comment!
Please enter your name here